ഷൂസിൽ വെള്ളം കയറി ദുർ​ഗന്ധമായോ? പരിഹാരം ഇതാ

മഴക്കാലത്ത് ഷൂസിൽ വെള്ളം കയറി ദുർ​ഗന്ധം ഉണ്ടാകുന്നത് എല്ലാവരേയും അലട്ടുന്ന പ്രശ്നമാണ്.

ഷൂസിലെ ഈ ദുർ​ഗന്ധം മാറ്റാൻ സഹായിക്കുന്ന ചില വഴികൾ പരിചയപ്പെടാം.

നനഞ്ഞ ഷൂസിനുള്ളിലെ ഇൻസോൾ ഉണ്ടെങ്കിൽ അത് പുറത്തെടുക്കുക.ശേഷം പഴയ ന്യൂസ്പേപ്പറുകൾ നന്നായി ചുരുട്ടി ഷൂസിനുള്ളിലേക്ക് തിരുകി വെയ്ക്കുക.

പത്രക്കടലാസ് ഷൂസിനുള്ളിലെ വെള്ളവും ഈർപ്പവും പൂർണ്ണമായി വലിച്ചെടുക്കും. ഇതോടെ ഷൂസ് വേ​ഗത്തിൽ ഉണങ്ങുകയും ദുർ​ഗന്ധം മാറുകയും ചെയ്യും.

നനഞ്ഞ ഷൂ അത്യാവശ്യം ഉണങ്ങിയതിന് ശേഷം ഒരു സ്പൂൺ ബേക്കിങ് സോഡ ഷൂസിനുള്ളിലേക്ക് നേരിട്ട് വിതറുക.ഒരു രാത്രി മുഴുവൻ ബേക്കിങ് സോഡ ഷൂവിനുള്ളിൽ കിടന്ന് രാവിലെ നന്നായി കുടഞ്ഞത് ഉപയോ​ഗിക്കാവുന്നതാണ്.

അൽപം ഉപ്പ് കോട്ടൺ തുണിയിലോ പഴയ സോക്സിലോ കെട്ടി ഷൂസിനുള്ളിൽ ഇറക്കി വെയ്ക്കുന്നതും ഈർപ്പം വലിച്ചെടുക്കാൻ സഹായിക്കും.

നനഞ്ഞ ഷൂസുകൾ ഒരിക്കലും അടഞ്ഞ പ്ലാസ്റ്റിക് കവറുകളിലോ ഇരുണ്ട ഷൂ റാക്കിലോ വെയ്ക്കരുത്. ഇത് ഫം​ഗസ് വളരാൻ കാരണമാകും.