“ചിലർ മഹാന്മാരായി ജനിക്കുന്നു; ചിലർ മഹത്വം നേടിയെടുക്കുന്നു; ചിലരുടെ മേൽ മഹത്വം വന്നുചേരുന്നു”: ഷേക്സ്പിയർ

വില്യം ഷേക്സ്പിയറുടെ ഏറ്റവും പ്രശസ്തമായ വാക്കുകളിൽ ഒന്നാണിത്. ഒരാളുടെ മഹത്വം എങ്ങനെ രൂപപ്പെടുന്നു എന്നതിനെ മൂന്ന് വ്യത്യസ്ത രീതികളിലൂടെയാണ് ഈ വരികൾ അവതരിപ്പിക്കുന്നത്.

ചിലർ ജന്മം കൊണ്ടുതന്നെ പ്രത്യേക സ്ഥാനമോ കഴിവുകളോ ഉള്ളവരായിരിക്കും. ചിലർ സ്വന്തം കഴിവും അധ്വാനവും കൊണ്ട് മഹത്വം നേടിയെടുക്കും. മറ്റുചിലർ അവർ ആഗ്രഹിച്ചില്ലെങ്കിലും സാഹചര്യങ്ങൾ അവരെ മഹത്തായ സ്ഥാനത്തേക്ക് ഉയർത്തും.

കഠിനാധ്വാനം, കഴിവ്, പരാജയങ്ങളെ അതിജീവിക്കൽ, ആത്മവിശ്വാസം എന്നിവയിലൂടെ ഒരാൾ സ്വയം മഹത്വത്തിലേക്ക് എത്തുന്നു. ജന്മനാ ലഭിച്ച അവസരങ്ങളേക്കാൾ സ്വന്തം പരിശ്രമം കൊണ്ട് ഉയരുന്നവരുടെ കഥകളെയാണ് വാക്കുകൾ ഓർമിപ്പിക്കുന്നത്.

ചിലപ്പോൾ ഒരാൾ മഹാനാകാൻ ശ്രമിച്ചിട്ടുപോലുമുണ്ടാകില്ല. പക്ഷേ സാഹചര്യങ്ങൾ, ഉത്തരവാദിത്തങ്ങൾ, ചരിത്രത്തിലെ ഒരു പ്രത്യേക നിമിഷം അയാളെ വലിയ സ്ഥാനത്തേക്ക് എത്തിക്കും. ഉദാഹരണത്തിന്, അപ്രതീക്ഷിതമായി ഒരു വലിയ ഉത്തരവാദിത്തം ഏറ്റെടുക്കേണ്ടിവരുന്ന ഒരാൾ പിന്നീട് അതിൽ മികച്ച നേതൃത്വം കാഴ്ചവയ്ക്കാം.

ഇംഗ്ലണ്ടിലെ ഏറ്റവും പ്രശസ്തനായ നാടകകൃത്തും കവിയും നടനുമായിരുന്നു വില്യം ഷേക്സ്പിയർ (1564–1616). ലോകസാഹിത്യത്തിലെ ഏറ്റവും സ്വാധീനമുള്ള എഴുത്തുകാരിൽ ഒരാൾ. 'ബ്രാഡ് ഓഫ് ഏവൺ' എന്നായിരുന്നു ഷേക്സ്പിയറിനെ വിശേഷിപ്പിച്ചിരുന്നത്. റോമിയോ ആൻഡ് ജൂലിയറ്റ്, ഹാംലെറ്റ്, മാക്ബത്ത്, ഒഥല്ലോ, കിംഗ് ലിയർ, ജൂലിയസ് സീസർ, ദ മർച്ചന്റ് ഓഫ് വെനീസ്, ട്വൽത്ത് നൈറ്റ് എന്നിവ പ്രധാന കൃതികളാണ്.

ട്വൽത്ത് നൈറ്റ് എന്ന നാടകത്തിലെ മാൽവോളിയോ എന്ന കഥാപാത്രത്തിന്റെ വാക്കുകളാണിവ. വലിയൊരു പദവിയും സാമൂഹിക ഉയർച്ചയും സ്വപ്നം കാണുന്ന കഥാപാത്രമാണ് മാൽവോളിയോ. തനിക്ക് വലിയ സ്ഥാനത്തിന് അർഹതയുണ്ടെന്നും അദ്ദേഹം വിശ്വസിക്കുന്നു.

ഒരു വ്യക്തി ഏത് കുടുംബത്തിൽ ജനിച്ചു എന്നത് ജീവിതത്തിന്റെ തുടക്കം മാത്രമാണ്. അവൻ/അവൾ പിന്നീട് എന്ത് ചെയ്യുന്നു എന്നതാണ് പലപ്പോഴും യഥാർഥ മഹത്വം നിർണയിക്കുന്നത്. സാഹചര്യങ്ങൾ ഒരാളെ ഉയർന്നതിയിൽ എത്തിച്ചാൽ അതിനൊപ്പം ഉത്തരവാദിത്തവും വരും. ഒരു പദവി ലഭിക്കുന്നത് മാത്രം മഹത്വമല്ല; ആ പദവി ഉപയോഗിച്ച് എന്താണ് ചെയ്യുന്നത് എന്നതാണ് ഒരാളെ യഥാർഥത്തിൽ വിലയിരുത്തുന്നത്.

നിങ്ങൾ എവിടെ നിന്നു വന്നു എന്നതിലുപരി, നിങ്ങൾ എന്തായി മാറുന്നു എന്നതാണ് പ്രധാനം.