‘കടലമാവ്’ മാജിക്കിലൂടെ ആഘോഷങ്ങളിൽ തിളങ്ങാം

ആഘോഷവേളകളിൽ ചർമ്മത്തിന് തിളക്കം കൂട്ടാൻ ഇനി ബ്യൂട്ടി പാർലറുകൾ തേടി അലയേണ്ടതില്ല.

നമ്മുടെ അടുക്കളയിലെ സ്ഥിരം സാന്നിധ്യമായ കടലമാവ് ഉപയോഗിച്ച് കുറഞ്ഞ ചിലവിൽ മികച്ച ഫേഷ്യലുകൾ വീട്ടിൽ തന്നെ ചെയ്യാം.

വിവിധ തരം ചർമ്മപ്രകൃതിയുള്ളവർക്ക് പരീക്ഷിക്കാവുന്ന കടലമാവ് ഉപയോ​ഗിച്ചിട്ടുള്ള ചില പൊടിക്കാകൾ നോക്കാം.

കടലമാവ്, മഞ്ഞൾ, ചന്ദനപ്പൊടി എന്നിവ പാലിലോ റോസ് വാട്ടറിലോ കലർത്തി മുഖത്ത് പുരട്ടുക. 10 മിനിറ്റിനു ശേഷം കഴുകിക്കളയാം. ഇത് ചർമ്മത്തിലെ നിറവ്യത്യാസം മാറ്റി തിളക്കം നൽകുന്നു.

കടലമാവ്, റോസാപ്പൂ ഇതളുകൾ, പാൽ, ഓട്‌സ്, തേൻ, ഏലക്ക പൊടിച്ചത്, എന്നിവ ചേർത്ത മിശ്രിതം മുഖത്ത് തേച്ച് 10 മിനിറ്റിനു ശേഷം കഴുകിക്കളയാം. ഓട്‌സ് ചർമ്മത്തിലെ മൃതകോശങ്ങളെ നീക്കം ചെയ്യുമ്പോൾ റോസാപ്പൂവ് ചർമ്മത്തിന് കുളിർമയേകുന്നു.

എണ്ണമയമുള്ള ചർമ്മക്കാർക്ക് വേപ്പിലയും തുളസിയും ചേർത്ത കടലമാവ് മിശ്രിതം ഏറ്റവും അനുയോജ്യമാണ്. ഇത് മുഖത്തെ ചുവന്ന പാടുകളും കുരുക്കളും മാറ്റാൻ സഹായിക്കും.

വെയിലേറ്റുണ്ടാകുന്ന കരിവാളിപ്പ് മാറ്റാൻ കടലമാവ്, കുങ്കുമപ്പൂവ്, അരിപ്പൊടി, മഞ്ഞൾ എന്നിവ പാലിൽ ചാലിച്ചു പുരട്ടുന്നത് ഉത്തമമാണ്.

കറുത്ത പാടുകൾ നീക്കി ചർമ്മം മൃദുവാക്കാൻ കടലമാവും പാൽപ്പാടയും ചേർന്ന കൂട്ട് സഹായിക്കും.