പാവയ്ക്കയിലെ കയ്പ്പ് എളുപ്പത്തിൽ അകറ്റാം

പാവയ്ക്ക നിരവധി പോഷകഗുണമുള്ള ഒരു പച്ചക്കറിയാണ്. ഇരുമ്പിന്റെ അഭാവമുള്ളവർക്ക് നിത്യഭക്ഷണത്തിൽ ഉൾപ്പെടുത്താനാവും ഇത്.

എന്നാൽ പാവയ്ക്കയുടെ കയ്പ്പ്‌ പലർക്കും ഇഷ്ടമല്ല. കുട്ടികൾക്കും മുതിർന്നവർക്കും ഒരുപോലെ കഴിക്കാൻ പറ്റുന്ന ആരോഗ്യ ഭക്ഷണമായിട്ടും പലരെയും ഇതിൽ നിന്ന്അകറ്റുന്നതും ഈ കയ്പ്പന്‍ രുചി തന്നെ.

എന്നാൽ പാവയ്ക്കയുടെ കയ്പ്പ് കുറയ്ക്കാന്‍ ഈ വഴികൾ പരീക്ഷിച്ചാലോ.

പാവയ്ക്കയുടെ തൊലി പൂർണമായും നീക്കം ചെയ്തതിന് ശേഷം നന്നായി കഴുകണം. അതുകഴിഞ്ഞ് പാവയ്ക്ക ചെറിയ കഷ്ണങ്ങളാക്കി മുറിച്ച് സൂക്ഷിക്കാം. ഇത് കയ്പ്പ് കുറയ്ക്കാൻ സഹായിക്കുന്നു.

തൊലി നന്നായി കളഞ്ഞതിന് ശേഷം പാവയ്ക്കയുടെ ഉള്ളിലുള്ള വിത്തുകൾ പൂർണമായും നീക്കം ചെയ്യണം. ഇങ്ങനെ ചെയ്യുന്നത് പാവയ്ക്കയുടെ കയ്പ്പ് കുറയ്ക്കാൻ നല്ലതാണ്.

കഷ്ണങ്ങളാക്കി മുറിച്ച പാവയ്ക്ക ഉപ്പു ഉപയോഗിച്ച് ഉരച്ച് കഴുകിയാൽ മതി. കയ്പ്പ് ഇല്ലാതാകും. അതേസമയം തിളപ്പിച്ച ഉപ്പ് വെള്ളത്തിൽ പാവയ്ക്ക മുക്കിവയ്ക്കുന്നതും കയ്പ്പ് അകറ്റാൻ സഹായിക്കുന്നു.

പാവയ്ക്കയിൽ ഉപ്പ് പുരട്ടിയതിന് ശേഷം കുറച്ച് നേരം അങ്ങനെ തന്നെ വെച്ചിരിക്കാം. അതുകഴിഞ്ഞ് പാവയ്ക്കയുടെ നീര് നന്നായി പിഴിഞ്ഞ് കളഞ്ഞതിന് ശേഷം പാചകം ചെയ്യാവുന്നതാണ്.

പാചകം ചെയ്യുന്നതിന് ഒരു മണിക്കൂർ മുമ്പ് പാവയ്ക്ക തൈരിൽ മുക്കിവെച്ചാൽ മതി. കൈപ്പിന്റെ കാഠിന്യം ഇതിലൂടെ കുറയ്ക്കാൻ സാധിക്കുന്നു.