ലോകത്തെ ഏറ്റവും കൊളസ്ട്രേൾ കുറഞ്ഞ രാജ്യം സൗത്ത് കൊറിയ; കാരണം ഈ ഭക്ഷണശീലവും ജനിതകവും

ലോകത്ത് ഏറ്റവും കുറവ് LDL അഥവാ ‘മോശം’ കൊളസ്ട്രോൾ നില രേഖപ്പെടുത്തിയിരിക്കുന്നത് ദക്ഷിണ കൊറിയയിലാണ്. 17 രാജ്യങ്ങളിലായി നടത്തിയ 46 കോടി ലിപിഡ് പരിശോധനകളുടെ വിശകലനത്തിലാണ് ഈ വ്യത്യാസം കണ്ടെത്തിയത്.

ദക്ഷിണ കൊറിയയിലെ പരമ്പരാഗത ഭക്ഷണക്രമം ഇതിന് ഒരു കാരണമാകാമെന്നാണ് ഗവേഷകർ വിലയിരുത്തുന്നത്. പുളിപ്പിച്ച ഭക്ഷണങ്ങൾ, പയർവർഗങ്ങൾ തുടങ്ങിയവയ്ക്ക് കൊറിയൻ ഭക്ഷണരീതിയിൽ പ്രധാന സ്ഥാനമുണ്ട്.

അതേസമയം, പൂരിത കൊഴുപ്പ് (saturated fat) താരതമ്യേന കുറഞ്ഞ ഭക്ഷണക്രമവും കൊളസ്ട്രോൾ നില കുറയുന്നതുമായി ബന്ധപ്പെട്ടിരിക്കുന്നു.

ശരാശരിയേക്കാൾ കുറഞ്ഞ കൊളസ്ട്രോൾ നില രേഖപ്പെടുത്തിയ മറ്റ് രാജ്യങ്ങളിൽ തുർക്കിയും അമേരിക്കയും ഉൾപ്പെടുന്നു. ഫാസ്റ്റ് ഫുഡിന്റെ ജന്മദേശമായി പൊതുവെ കണക്കാക്കപ്പെടുന്ന അമേരിക്ക പട്ടികയിൽ ഉൾപ്പെട്ടത് ശ്രദ്ധേയമാണെന്നും റിപ്പോർട്ട് പറയുന്നു.

ഓസ്ട്രിയയും ജർമനിയുമാണ് ഏറ്റവും ഉയർന്ന കൊളസ്ട്രോൾ നില രേഖപ്പെടുത്തിയ രാജ്യങ്ങൾ. ജപ്പാൻ, ഓസ്ട്രേലിയ, സ്വിറ്റ്സർലൻഡ് എന്നിവയും ഉയർന്ന നിലയിൽ കൊളസ്ട്രോളുള്ള രാജ്യങ്ങളുടെ പട്ടികയിലുണ്ട്.

മൃഗക്കൊഴുപ്പും പാലുൽപ്പന്നങ്ങളും കൂടുതലായി ഉപയോഗിക്കുന്ന ഭക്ഷണക്രമം ചില രാജ്യങ്ങളിലെ ഉയർന്ന കൊളസ്ട്രോൾ നിലയ്ക്ക് കാരണമാകാമെന്നാണ് വിലയിരുത്തൽ. എന്നാൽ ഭക്ഷണം മാത്രമല്ല കാരണം.

കൊളസ്ട്രോൾ നിലയിൽ ജനിതക ഘടകങ്ങൾക്കും വലിയ സ്വാധീനമുണ്ട്. ഓസ്ട്രിയയിൽ ഏകദേശം 300 പേരിൽ ഒരാൾക്ക് ഫമീലിയൽ ഹൈപ്പർകൊളസ്ട്രോളീമിയ എന്ന പാരമ്പര്യ രോഗാവസ്ഥയുണ്ടെന്നാണ് റിപ്പോർട്ട്. ഈ ജനിതക അവസ്ഥ LDL കൊളസ്ട്രോൾ ഉയരാനും അതുവഴി ഹൃദ്രോഗ സാധ്യത വർധിക്കാനും കാരണമാകാം.

1980 മുതൽ 2018 വരെയുള്ള കണക്കുകൾ പരിശോധിച്ച പഠനത്തിൽ പല സമ്പന്ന പാശ്ചാത്യ രാജ്യങ്ങളിലും കൊളസ്ട്രോൾ നില ഗണ്യമായി കുറഞ്ഞതായി കണ്ടെത്തി. അതേസമയം, താഴ്ന്നതും ഇടത്തരം വരുമാനമുള്ളതുമായ പല രാജ്യങ്ങളിലും കൊളസ്ട്രോൾ നില ഉയർന്നതായി പഠനങ്ങൾ സൂചിപ്പിക്കുന്നു. പ്രത്യേകിച്ച് ഏഷ്യൻ രാജ്യങ്ങളിൽ ഈ വർധന ശ്രദ്ധേയമാണ്.