ശരീരഭാരം കുറയ്ക്കണോ? ഈ ‘സൂപ്പർ പാനീയം’ കുടിക്കാം

ആരോഗ്യസംരക്ഷണത്തിന് മുൻഗണന നൽകുന്നവർക്കിടയിൽ റാഗി പ്രിയമേറിയ ഭക്ഷണമായിക്കൊണ്ടിരിക്കുകയാണ്.

പാരമ്പര്യമായി കുറുക്കായും പുട്ടായും ദോശയായും ഉപയോഗിച്ചിരുന്ന റാഗിയെ, ഇന്നത്തെ കാലത്ത് രുചികരമായ ‘സ്മൂത്തി’ രൂപത്തിൽ അവതരിപ്പിക്കുകയാണ് ആരോഗ്യവിദഗ്ധർ.

ശരീരഭാരം കുറയ്ക്കാൻ ആഗ്രഹിക്കുന്നവർക്കും പ്രമേഹരോഗികൾക്കും ഒരുപോലെ ഗുണകരമായ ഈ പാനീയം പ്രഭാതഭക്ഷണത്തിന് മികച്ചൊരു പകരക്കാരനാണ്.

മറ്റ് പാനീയങ്ങളെ അപേക്ഷിച്ച് റാഗി സ്മൂത്തി കുടിക്കുന്നത് ദീർഘനേരം വയർ നിറഞ്ഞതായി തോന്നിപ്പിക്കും, ഇത് അമിതാഹാരം ഒഴിവാക്കി ശരീരഭാരം കുറയ്ക്കാൻ സഹായിക്കുന്നു.

ആവശ്യമായ ചേരുവകൾ

റാഗിപ്പൊടി – 2 ടേബിൾ സ്പൂൺ

പാൽ (അല്ലെങ്കിൽ തേങ്ങാപാൽ/ബദാം പാൽ) – 1 കപ്പ്

നേന്ത്രപ്പഴം അല്ലെങ്കിൽ ഞാലിപ്പൂവൻ പഴം – 1 എണ്ണം

ഈന്തപ്പഴം – 3-4 എണ്ണം

ഏലയ്ക്കാപ്പൊടി – ഒരു നുള്ള്

തയ്യാറാക്കേണ്ട രീതി

ആദ്യം റാഗിപ്പൊടി അല്പം വെള്ളത്തിൽ കലക്കി കുറുക്കി എടുക്കുക.

ഇത് തണുത്ത ശേഷം പഴം, ഈന്തപ്പഴം, പാൽ, ഏലയ്ക്കാപ്പൊടി എന്നിവ ചേർത്ത് മിക്സിയിൽ നന്നായി അടിച്ചെടുക്കുക.

മധുരം ആവശ്യമുള്ളവർക്ക് ശർക്കരയോ തേനോ ഉപയോഗിക്കാം.