കഴിക്കാൻ മാത്രമല്ല മുഖ സൗന്ദര്യത്തിനും ബെസ്റ്റാണ് സ്ട്രോബറി

വൈറ്റമിൻ സി കൊണ്ടു സമ്പുഷ്ടമാണ് സ്ട്രോബെറി.

വൈറ്റമിൻ സി ധാരാളമുള്ളതിനാൽ ചർമ്മത്തിന്റെ സൗന്ദര്യം വർധിപ്പിക്കാനും സ്ട്രോബറി സഹായിക്കും.

മുഖ സൗന്ദര്യത്തിന് സ്ട്രോബറി എങ്ങനെയല്ലാം ഉപയോ​ഗിക്കാം എന്ന് നോക്കാം.

മൂന്നോ നാലോ നോൺ കോട്ടഡ് ആസ്പിരിൻ ഗുളിക പൊടിച്ചത്, ഒരു നാരങ്ങയുടെ നീര്, ഒരു സ്ട്രോബെറി ഉടച്ചത് എന്നിവ ചേർത്തു യോജിപ്പിക്കുക. പഞ്ഞിയുപയോഗിച്ച് ഇതു മുഖത്തു തേച്ചു പിടിപ്പിച്ചു പത്തു മിനിറ്റിനുശേഷം കഴുകാം. കുരുക്കൾ അകന്നു മുഖത്തെ ചർമം തിളങ്ങും.

തൈരു തുണിയിൽ കിഴി കെട്ടി വെള്ളം വാർന്നു പോയ ശേഷം സ്ട്രോബെറി ചേർത്ത് മിക്സിയിൽ അടിച്ചെടുക്കുക. ഇതു മുഖത്തു തേച്ചു പിടിപ്പിച്ച് അഞ്ചു മിനിറ്റ് കഴിയുമ്പോൾ നന്നായി മസാജ് ചെയ്യാം. പത്തു മിനിറ്റിനുശേഷം മുഖം കഴുകുക .ഈ പാക്ക് മുഖത്തെ കരുവാളിപ്പ് മായ്ക്കാൻ സഹായിക്കും

തണുപ്പിച്ച കറ്റാർവാഴ ജെല്ലും സ്ട്രോബെറിയും സമം ചേർത്ത് കൺതടങ്ങളിൽ പുരട്ടാം. ഇതേ മിശ്രിതം ഐസ്ക്യൂബ് രൂപത്തിലാക്കി സൂക്ഷിക്കാനുമാകും. ഇങ്ങനെ ചെയ്യുന്നത് കണ്‍തടങ്ങളിലെ തടിപ്പും കരുവാളിപ്പും മാറ്റാൻ സഹായിക്കും.

സ്ട്രോബെറിയും തേനും ചേർത്ത് അരച്ചെടുക്കുക. സോഫ്റ്റ് ബേബി ടൂത്ബ്രഷുപയോഗിച്ച് ഇതു ചുണ്ടിൽ പുരട്ടി സ്ക്രബ് ചെയ്യുന്നത് ഉണങ്ങിയ ചുണ്ടുകൾ മാറി തിളക്കവും മിനുസവുമുള്ള ചുണ്ടുകൾ സ്വന്തമാക്കാൻ നിങ്ങളെ സഹായിക്കും.

നാലു സ്ട്രോബെറി ഞെട്ടു കളഞ്ഞ് ഉടച്ചെടുത്തത്, അരക്കപ്പ് ബ്രൗൺ ഷുഗർ പൊടിച്ചത്, കാൽകപ്പ് ബദാം എണ്ണ എന്നിവ യോജിപ്പിച്ച് ശരീരം മുഴുവൻ സ്ക്രബ് ചെയ്യാം. ഇളം ചൂടുവെള്ളത്തിൽ കുളിക്കാം.ഇത് ചർമത്തിന് മൃദുത്വം നൽകും