ചൂടുകൂടിയപ്പോൾ ദഹനക്കേട്? വയറിന് ആശ്വാസം ഈ പഴങ്ങൾ

കഠിനമായ വേനൽച്ചൂട് ശരീരത്തിൻ്റെ ആന്തരിക പ്രവർത്തനങ്ങളെ, പ്രത്യേകിച്ച് ദഹനവ്യവസ്ഥയെ സാരമായി ബാധിക്കും. നിർജ്ജലീകരണം മൂലം ദഹനപ്രക്രിയ മന്ദ​ഗതിയിലാകുന്നത് അസിഡിറ്റി, മലബന്ധം, ഇറിറ്റബിൾ ബവൽ സിൻഡ്രോം പോലുള്ള ആരോ​ഗ്യപ്രശ്നങ്ങൾക്ക് കാരണമാകാം.

നമ്മുടെ ആന്തരിക ആരോഗ്യത്തിന്റെ അടിത്തറ ദഹനവ്യവസ്ഥയാണ്. വേനൽക്കാലത്ത് ശരിയായ രീതിയിൽ നാരുകളും ജലാംശവും അടങ്ങിയ പഴങ്ങൾ ഭക്ഷണത്തിൽ ഉൾപ്പെടുത്തുന്നത് വഴി രോഗപ്രതിരോധ ശേഷി വർധിപ്പിക്കാനും ശരീരത്തെ തണുപ്പിക്കാനും സാധിക്കും.

തണ്ണിമത്തൻ

90 ശതമാനം ജലാംശം അടങ്ങിയ തണ്ണിമത്തൻ ചൂടുകാലത്ത് കഴിക്കാവുന്ന മികച്ച പഴമാണ്. ഇതിലടങ്ങിയിരിക്കുന്ന ലൈക്കോപീൻ, വിറ്റാമിൻ സി, പോളിഫെനോൾസ് എന്നിവ വീക്കങ്ങൾ കുറക്കാനും ശരീരത്തിന് പ്രതിരോധശേഷി നൽകാനും സഹായിക്കും.

തണ്ണിമത്തന്റെ ചുവന്ന ഭാഗത്തോടൊപ്പം വെളുത്ത തൊലിഭാഗവും കഴിക്കുന്നത് നാരുകൾ ലഭിക്കാൻ സഹായിക്കുമെന്ന് പഠനങ്ങൾ ചൂണ്ടിക്കാണിക്കുന്നു. ഇത് കൊളസ്ട്രോൾ ആഗിരണം കുറക്കാനും ദഹനം സുഗമമാക്കാനും സഹായിക്കും.

പപ്പായ

ദഹനസംബന്ധമായ പ്രശ്നങ്ങൾക്ക് പപ്പായ ഒരു മികച്ച ഔഷധമാണ്. പപ്പായയിലടങ്ങിയിരിക്കുന്ന 'പാപ്പെയ്ൻ' (Papain), 'കൈമോപാപ്പെയ്ൻ' (Chymopapain) എന്നീ എൻസൈമുകൾ പ്രോട്ടീൻ ദഹനത്തെ വേഗത്തിലാക്കുന്നു.

മാമ്പഴം

മാമ്പഴത്തിൽ ധാരാളം പോളിഫെനോളുകളും പ്രീബയോട്ടിക് നാരുകളും അടങ്ങിയിട്ടുണ്ട്. ഇത് കുടലിലെ നല്ല ബാക്ടീരിയകളുടെ വളർച്ചയെ പ്രോത്സാഹിപ്പിക്കും.

നേന്ത്രപ്പഴം

പൊട്ടാസ്യത്തിന്റെ കലവറയായ നേന്ത്രപ്പഴം ദഹനവ്യവസ്ഥയെ ശാന്തമാക്കാൻ സഹായിക്കുന്നു. സ്ഥിരമായി പഴം കഴിക്കുന്നത് കുടൽ സംബന്ധമായ വിട്ടുമാറാത്ത രോഗങ്ങളെ തടയാൻ സഹായിക്കും. പഴുത്തതായാലും പച്ചയായാലും ഇതിലെ നാരുകൾ ദഹനപ്രക്രിയയെ സുഗമമാക്കും.

പൈനാപ്പിൾ

പൈനാപ്പിളിലടങ്ങിയിരിക്കുന്ന 'ബ്രോമെലെയ്ൻ' (Bromelain) എന്ന എൻസൈം ദഹനത്തെ സഹായിക്കുന്നതോടൊപ്പം ശരീരത്തിലെ വീക്കങ്ങൾ കുറക്കുകയും ചെയ്യുന്നു. കൂടാതെ കുടലിലെ ബാക്ടീരിയകളുടെ സന്തുലിതാവസ്ഥ നിലനിർത്താൻ സഹായിക്കും.