വേനൽക്കാലത്ത് വെള്ളം മാത്രം കുടിച്ചാൽ പോരാ

വേനൽക്കാലത്ത് ശരീരത്തിൽ നിന്ന് അധിക ജലം നഷ്ടമാകാനുള്ള സാധ്യതയുണ്ട്. ഇത് നിർജ്ജലീകരണത്തിലേക്ക് നയിക്കും. ഇത് തടയുന്നതിന് പകൽ സമയങ്ങളിൽ നന്നായി വെള്ളം കുടിക്കാൻ ശ്രദ്ധിക്കുക.

ശുദ്ധ ജലം, സംഭാരം, ഉപ്പിട്ട കഞ്ഞിവെള്ളം, നാരങ്ങാവെള്ളം എന്നിവ കുടിക്കുന്നത് ശരീരത്തിൽ നിർജ്ജലീകരണം തടയാൻ സഹായിക്കും.

വേനൽക്കാലത്ത് തണുത്ത വെള്ളം കുടിക്കുന്നത് ഒഴിവാക്കുന്നതാണ് നല്ലത്. തിളപ്പിച്ചാറിയ വെള്ളം കുടിക്കുന്നതാണ് മികച്ചത്. ചൂടു വെള്ളത്തിലേക്ക് തണുത്ത വെള്ളം കലർത്തിക്കുടിക്കുന്ന ശീലവും ഒഴിവാക്കാം.

ചൂടു കൂടുന്ന സാഹചര്യത്തിൽ മദ്യം, കാപ്പി, ചായ പോലുള്ളവ പരിമിതപ്പെടുത്താം. വൃക്ക, കരൾ രോഗമുള്ളവർ ഡോക്ടർ നിർദേശിച്ച അളവിൽ മാത്രം വെള്ളം കുടിക്കുക.

തണ്ണിമത്തൻ, ഓറഞ്ച്, പൈനാപ്പിൾ മുതലായ പഴങ്ങളും പച്ചക്കറി സാലഡുകളും കൂടുതലായി ഭക്ഷണത്തിൽ ഉൾപ്പെടുത്തണം.

മുള്ളങ്കി, കുരുമുളക്, സവാള, വെളുത്തുള്ളി, ബീറ്റ്‌റൂട്ട് എന്നിവ ശരീരതാപം കൂട്ടുന്നവയാണ്.

പഴച്ചാറുകളിൽ ഗ്ലൂക്കോസ് ചേർത്ത് കുടിക്കാം. ഒപ്പം വിറ്റാമിൻ സി അടങ്ങിയ പഴവർഗങ്ങൾ കൂടുതലായി കഴിക്കാം.