അന്യഭാഷാ ചിത്രങ്ങളിൽ നിറഞ്ഞു നിന്ന കേരളത്തിന്റെ സൗന്ദര്യം

കേരളത്തിൽ എവിടെ ക്യാമറവെച്ചാലും നല്ല ഫ്രെയിമുകളാണെന്നാണ് ഒട്ടുമിക്ക സിനിമാറ്റോ​ഗ്രാഫർമാരും പറയുന്നത്. മലയാളത്തിന് പുറമേ നിരവധി ചിത്രങ്ങളാണ് കേരളത്തിൽ ഷൂട്ട് ചെയ്തിരിക്കുന്നത്. അതിലെ കുറച്ച് സിനിമകളെ പരിചയപ്പെടാം

ബാഹുബലി

2015ൽ എസ്.എസ് രാജമൗലി സംവിധാനം ചെയ്ത് പുറത്തിറങ്ങിയ സിനിമയാണ് ബാഹുബലി: ദ ബിഗിനിങ്. പ്രഭാസ്, റാണ ദഗ്ഗുബാട്ടി, തമന്ന ഭാട്ടിയ, അനുഷ്ക ഷെട്ടി തുടങ്ങിയവരായിരുന്ന മുഖ്യ കഥാപാത്രങ്ങൾ. സിനിമയിൽ ഒട്ടുമിക്ക സീനുകളും ചൂട്ട് ചെയ്തിരിക്കുന്നത് കേരളത്തിലെ അതിരപ്പിള്ളിയിലും സമീപ പ്രദേശങ്ങളിലുമാണ്.

രാവണ്‍

മണിരത്നത്തിന്റെ സംവിധാനത്തിൽ ഐശ്വര്യ റായ്, വിക്രം, പൃഥ്വിരാജ് സുകുമാരൻ തുടങ്ങിയവർ പ്രധാനവേഷങ്ങളിൽ അഭിനയിച്ച് 2010 -ൽ പുറത്തിറങ്ങിയ ചലച്ചിത്രമാണ് രാവണ്‍. സന്തോഷ് ശിവനും വി മണികണ്ഠനുമായിരുന്നു ഛായാ​ഗ്രാഹകർ. അതിരപ്പാള്ളിയുടെ സൗന്ദര്യമാണ് ചിത്രത്തിന്റെ പ്രധാന ആകര്‍ഷണം.

ദിൽ സേ

1998-ൽ പുറത്തിറങ്ങിയ ഹിന്ദി റൊമാന്റിക് ത്രില്ലർ ചിത്രമാണ്. മണിരത്നം രചനയും സംവിധാനവും നിർവഹിച്ച ചിത്രത്തിൽ ഷാരൂഖ് ഖാൻ, മനീഷ കൊയ്‌രാള, പ്രീതി സിന്റ എന്നിവരാണ് പ്രധാന കഥാപാത്രങ്ങൾ. ആലപ്പുഴയുടേയും അതിപ്പിള്ളിയുടേയും സൗന്ദര്യത്തിലൂടേയാണ് ചിത്രത്തിലെ പല രം​ഗങ്ങളും പാട്ടുകളും ചിത്രീകരിച്ചിരിക്കുന്നത്.

ഗുരു

മണിരത്നത്തിന്റെ സംവിധാനത്തിൽ അഭിഷേക് ബച്ചൻ , ഐശ്വര്യ റായ് എന്നിവർ അഭിനയിച്ച ചിത്രം 2007ലാണ് പുറത്തിറങ്ങിയത്. ചിത്രത്തിലും അതിരപ്പിള്ളി പ്രാധാന ലൊക്കേഷനുകളിലൊന്നായിരുന്നു.

ചെന്നൈ എക്സ്പ്രസ്

കേരളത്തിലെ മൂന്നാറിന്റെ ഭം​ഗി കാണിച്ചു തന്ന സിനിമയാണ് 2013 ൽ പുറത്തിറങ്ങിയ ചെന്നൈ എക്സ്പ്രസ്. ചിത്രത്തിൽ ദീപിക പദുക്കോൺ , ഷാരൂഖ് ഖാൻ എന്നിവരായിരുന്നു പ്രധാന കഥാപാത്രങ്ങൾ. ചിത്രത്തിലെ കശ്മീർ മെയിൻ ടു കന്യാകുമാരി പാട്ടിൽ ഉടനീളം കാണിക്കുന്നത് മൂന്നാറിൻെ ഭം​ഗിയും കേരളത്തിന്റെ സംസ്കാരവുമാണ്

വിണ്ണൈ താണ്ടി വരുവായ

ഗൌതം മേനോൻ സംവിധാനം ചെയ്ത് 2010-ൽ പുറത്തിറങ്ങിയ തമിഴ് റൊമാന്റിക് ചിത്രമാണിത്. സിലമ്പരശൻ, തൃഷ എന്നിവരാണ് ഈ ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചത്. ആലപ്പുഴക്കാരിയായ മലയാളിയായാണ് ചിത്രത്തിൽ തൃഷ എത്തുന്നത്. ചിത്രത്തിന്റെ തുടക്കത്തിലും പ്രധാനഭാ​ഗങ്ങളിലുമെല്ലാം ആലപ്പുഴ പ്രധാന ലൊക്കേഷനാണ്.

പരം സുന്ദരി

സിദ്ധാര്‍ഥ് മല്‍ഹോത്ര- ജാൻവി കപൂര്‍ ചിത്രം പരം സുന്ദരിയിലും കേരളത്തിന് വലിയ പ്രാധാന്യമുണ്ട്. ചിത്രത്തിൽ ജാൻവി എത്തുന്നത് മലയാളിയായണ്. ചിത്രത്തിന്റെ പ്രധാന ഭാ​ഗങ്ങളുടെ ചിത്രീകരണവും കേരളത്തിലാണ് നടന്നത്.

കർവാൻ

2018-ൽ ഹിന്ദിയിൽ ഇറങ്ങിയ റോഡ് കോമഡി-ഡ്രാമ ചിത്രമാണിത്. പ്രീതി രതി ഗുപ്ത എന്നിവർ സംവിധാനം ചെയ്ത ചിത്രമാണിത്. ദുൽഖർ സൽമാനും, മിഥില പാൽക്കറുമാണ് കേന്ദ്ര കഥാപാത്രങ്ങളായി എത്തിയത്. കേരളത്തിന്റെ ഭം​ഗി പൂർണ്ണമായും ചിത്രത്തിൽ ഛായാ​ഗ്രാഹകൻ ഒപ്പിയെടുത്തിട്ടുണ്ട്.

ലൈഫ് ഓഫ് പൈ

ആങ് ലീ സംവിധാനം ചെയ്ത് 2012-ൽ പുറത്തിറങ്ങിയ ഒരു സാഹസിക-നാടക ചിത്രമാണ് ലൈഫ് ഓഫ് പൈ. കേരളത്തിലെ മൂന്നാറിലും ചിത്രത്തിന്റെ പല ഭാ​ഗങ്ങളും ചിത്രീകരിച്ചിട്ടുണ്ട്.