എങ്ങനെ വീണാലും നാല് കാലില്‍, പൂച്ച സാറിനിത് എങ്ങനെ സാധിക്കുന്നു

പൂച്ചകൾ എത്ര ഉയരത്തിൽ നിന്ന് വീണാലും കൃത്യമായി നാലുകാലിൽ തന്നെ വീഴാറുണ്ട്.

എങ്ങനെയാണ് ഇങ്ങനെ സുരക്ഷിതമായി നാലുകാലിൽ പൂച്ച വീഴുന്നത് എന്ന് ചിന്തിച്ച് നോക്കിയിട്ടുണ്ടോ?

‘റൈറ്റിങ് റിഫ്ലെക്സ്’ എന്നാണ് ഇത് അറിയപ്പെടുന്നത്.

ഒരു പൂച്ച വീഴാൻ തുടങ്ങുമ്പോൾത്തന്നെ അതിന്റെ ശരീരം അതിവേഗം പ്രതികരിച്ചു തുടങ്ങും.

ശരീരത്തിന് സന്തുലിതാവസ്ഥ നൽകുന്ന ആന്തരിക കർണം ആദ്യം തലച്ചോറിന് ഒരു സന്ദേശം നൽകും, ഏതാണ് മുകൾഭാഗം, ഏതാണ് താഴെയെന്ന്.

ഒരു നിമിഷത്തിനുള്ളിൽ, പൂച്ച തലതിരിച്ച് തറയിലേക്ക് മുഖം നേരെയാക്കും. തുടർന്ന്, വഴക്കമുള്ള നട്ടെല്ല് വളയുകയും തിരിയുകയും ചെയ്യും.

അടുത്ത ഘട്ടത്തിൽ പൂച്ച മുൻകാലുകൾ ഉള്ളിലേക്ക് വലിക്കുകയും പിൻകാലുകൾ പുറത്തേക്ക് നീട്ടുകയും ചെയ്യും. ഇത് ശരീരത്തിന്റെ മുൻപകുതി അതിവേഗം തിരിയാൻ സഹായിക്കുന്നു.

ശേഷം നേരെ തിരിച്ച്, മുൻകാലുകൾ നീട്ടുകയും പിൻകാലുകൾ ഉള്ളിലേക്ക് വലിക്കുകയും ചെയ്തുകൊണ്ട് ശരീരത്തിന്റെ ബാക്കി ഭാഗവും ശരിയായ നിലയിലേക്ക് കൊണ്ടുവരുന്നു.

പൂച്ചകൾക്ക് ശക്തമായ പേശികളും ഭാരം കുറഞ്ഞ എല്ലുകളുമുണ്ട്. ഇത് വായുവിലൂടെയുള്ള ചലനങ്ങൾ നിയന്ത്രിക്കാൻ അവയെ സഹായിക്കുന്നു.

നിലം തൊടുന്നതിന് തൊട്ടുമുൻപ്, കാലുകൾ വിടർത്തി ഒരു ഷോക്ക് അബ്സോർബർ പോലെ പ്രവർത്തിച്ച് വീഴ്ചയുടെ ആഘാതം കുറയ്ക്കുന്നു.

എന്നാൽ പൂച്ചകൾ എല്ലായ്‌പ്പോഴും കൃത്യമായി നാലുകാലിൽ വീഴണമെന്നില്ല.

വളരെ ചെറിയ ഉയരത്തിൽ നിന്നാണ് വീഴുന്നതെങ്കിൽ, ശരീരം പൂർണമായി തിരിക്കാൻ അവയ്ക്ക് മതിയായ സമയം ലഭിച്ചേക്കില്ല. അതുപോലെ, വളരെ ഉയരത്തിൽ നിന്നുള്ള വീഴ്ച അപകടകരവുമാണ്.