വീട്ടിലെ സോഫയ്ക്കും കസേരയ്ക്കുമുണ്ട് പറയാൻ ഒരുപാട് കഥകൾ; അറിയാം ചില കൗതുകങ്ങൾ

വീട്ടിലെ സോഫ, കസേര, മേശ, കട്ടിൽ, അലമാര തുടങ്ങിയവയെല്ലാം നമ്മുടെ ദൈനംദിന ജീവിതത്തിന്റെ ഭാഗമാണ്. എന്നാൽ നിത്യേന ഉപയോഗിക്കുന്ന ഈ ഫർണിച്ചറുകൾക്ക് പിന്നിൽ രസകരമായ ചരിത്രവും കൗതുകകരമായ നിരവധി വസ്തുതകളുമുണ്ട്.

ശരാശരി ഒരു സോഫ ഏകദേശം എട്ട് വർഷത്തോളം ഉപയോഗിക്കാമെന്നാണ് വിദഗ്ധർ പറയുന്ന കണക്ക്. ഈ കാലയളവിൽ കുടുംബാംഗങ്ങളും സുഹൃത്തുക്കളുമൊക്കെയായി എണ്ണമറ്റ ആളുകൾ അതിൽ ഇരിക്കുകയും ഭക്ഷണം കഴിക്കുകയും സിനിമ കാണുകയും ചെയ്തിട്ടുണ്ടാകാം.

ഫ്രഞ്ച് ഡിസൈനറായ ഐലീൻ ഗ്രേ രൂപകൽപ്പന ചെയ്ത, പിന്നീട് ഇവ്സ് സെന്റ് ലോറന്റ് സ്വന്തമാക്കിയിരുന്ന ഡ്രാഗൺ ചെയറാണ് ഏറ്റവും ഉയർന്ന വിലയ്ക്ക് വിറ്റഴിക്കപ്പെട്ട ഫർണിച്ചർ. 2009ൽ ഈ കസേര ഏകദേശം 38 മില്യൺ ഡോളറിന് ലേലത്തിൽ വിറ്റതായാണ് റിപ്പോർട്ടുകൾ.

ഒരു സോഫ അതിന്റെ ആയുസ്സിനിടെ ശരാശരി 782 പേരെയെങ്കിലും ഇരുത്തിയിട്ടുണ്ടാകാമെന്നാണ് ലേഖനം പറയുന്നത്. കുടുംബാംഗങ്ങൾ മുതൽ അതിഥികൾ വരെ എത്രയോ പേരുടെ ഓർമകൾക്ക് സോഫ സാക്ഷിയാകുന്നുവെന്നതാണ് ഇതിലെ കൗതുകം.

നമ്മുടെ ഭക്ഷണമേശയ്ക്ക് പിന്നിലും പുരാതന ചരിത്രമുണ്ട്. ടേബിൾ എന്ന വാക്കിന്റെ ഉത്ഭവം ലാറ്റിൻ ഭാഷയിലെ ടാബുല എന്ന വാക്കിൽ നിന്നാണത്രേ. പരന്ന ബോർഡിനെയോ പലകയെയോ സൂചിപ്പിക്കാനായിരുന്നു ഈ വാക്ക് ഉപയോഗിച്ചിരുന്നത്.

ഓക്സ്ഫോർഡിലെ ബോഡ്‌ലിയൻ ലൈബ്രറി ലോകത്തിലെ ഏറ്റവും പഴയ ലൈബ്രറികളിലൊന്നാണ്. ഒരുകാലത്ത് അവിടെയുള്ള പുസ്തകങ്ങൾ മോഷണം പോകാതിരിക്കാൻ അലമാരകളിൽ ചങ്ങല ഉപയോഗിച്ച് ബന്ധിപ്പിച്ചിരുന്നുവെന്നാണ് പറയപ്പെടുന്നത്. വായിക്കാൻ പുസ്തകം എടുക്കാമെങ്കിലും അത് പൂർണമായി കൊണ്ടുപോകാൻ കഴിയാത്ത രീതിയിലായിരുന്നു സംവിധാനം.

ജപ്പാനിലെ തതാമി പരമ്പരാഗതമായി മടക്കിവയ്ക്കാനോ അടുക്കിവയ്ക്കാനോ കഴിയുന്ന രീതിയിലുള്ള പായയാണ്. അരിത്തണ്ടിൽനിന്ന് നിർമ്മിച്ചിരുന്ന ഇവ ഉപയോഗിക്കാത്തപ്പോൾ മാറ്റിവയ്ക്കാൻ സാധിച്ചിരുന്നു. എട്ട് തതാമി പായകൾ ഉപയോഗിച്ച മുറി ഒരുകാലത്ത് ഉയർന്ന സാമൂഹിക പദവിയുടെ അടയാളമായിരുന്നുവെന്നും ലേഖനം പറയുന്നു.

ഒരു മനുഷ്യൻ ജീവിതത്തിന്റെ ഏകദേശം മൂന്നിലൊന്ന് സമയം ഉറങ്ങിക്കൊണ്ടാണ് ചെലവഴിക്കുന്നതെന്നാണ് പറയപ്പെ‌ടുന്നത്. ഒരു ജീവിതകാലത്ത് ഇത് ഏകദേശം 26 വർഷത്തോളം വരും.

ഉപയോഗിക്കുന്ന വസ്തുവെന്നതിനപ്പുറം ഫർണിച്ചർ മനുഷ്യരുടെ ജീവിതരീതിയുടെയും സാമൂഹിക പദവിയുടെയും സാങ്കേതിക മാറ്റങ്ങളുടെയും ഭാഗമായാണ് വളർന്നത്. അതുകൊണ്ടുതന്നെ അടുത്ത തവണ സോഫയിലോ കസേരയിലോ ഇരിക്കുമ്പോൾ അതിന് പിന്നിലെ ഈ കൗതുകകരമായ ചരിത്രവും ഓർക്കാം.