പുതിയ ദോശക്കല്ല് ആണോ? ഇനി മാവ് ഒട്ടിപ്പിടിക്കില്ല, ഈ ട്രിക്കുകൾ ചെയ്തു നോക്കൂ

പുതിയ ദോശക്കല്ലിൽ ദോശയുണ്ടാക്കുമ്പോള്‍ മാവ് ഒട്ടിപ്പിടിക്കുന്നത് വലിയൊരു പ്രശ്നമാണ് പലര്‍ക്കും.

കല്ലിനെ മയക്കി പരുവത്തിൽ ആക്കിയാൽ ദോശ നല്ലപോലെ കിട്ടും എന്ന് പഴമക്കാർ പറയാറുണ്ട്.

വെളിച്ചെണ്ണ തേച്ചുകൊടുത്തും സവാള മുറിച്ച് ഉരച്ചുമൊക്കെ കല്ലിനെ മയക്കിയെടുക്കാറുണ്ട് നമ്മൾ.

സമയം കളയാതെ പെട്ടെന്ന് ദോശക്കല്ല് മയക്കി എടുക്കാൻ ചില വഴിയുണ്ട്.

4 അല്ലി കുടംപുളി പേസ്റ്റ് പരുവത്തിൽ അരച്ചെടുക്കുക. ചൂടായ ദോശക്കലിൽ ഈ പേസ്റ്റ് ഒഴിച്ച് നന്നായി തിളപ്പിക്കാം. ശേഷം തീ അണയ്ക്കാം. 10 മിനിറ്റ് ദോശക്കല്ലിൽ വച്ചതിന് ശേഷം കഴുകി കളയാം. ഉടൻ തന്നെ ദോശ ഉണ്ടാക്കിയാൽ നല്ല ക്രിസ്പിയായി ദോശ ഉണ്ടാക്കാം, മാവ് ഒട്ടിപിടിക്കുകയും ഇല്ല.

ദോശക്കല്ല് ചൂടാകുമ്പോൾ വെള്ളം തളിച്ച ശേഷം കുറച്ചു നല്ലെണ്ണ കല്ലിൽ തേച്ചു കൊടുക്കുക. ഇനി ദോശ കല്ലിൽ പരത്തി കൊടുക്കാവുന്നതാണ്. ഒട്ടും ഒട്ടിപിടിക്കാതെ ദോശ എടുക്കാൻ സാധിക്കും.

സവാള തൊലി കളയാതെ രണ്ടായി മുറിച്ച ശേഷം ഒരു കഷ്ണത്തിൽ ഫോർക് കുത്തി കൊടുക്കുക. ചൂടായ ദോശക്കല്ലിൽ സവാള തേച്ചു കൊടുത്ത ശേഷം ദോശ പരത്തുക. നല്ല ക്രിസ്പിയായ കനം കുറഞ്ഞ ദോശ ഉണ്ടാക്കി എടുക്കുവാൻ സാധിക്കും.

ചൂടായ ദോശക്കല്ലിൽ കുറച്ചു വെള്ളം തളിച്ച ശേഷം മാത്രം ദോശ ചുടുക. ഇത് കല്ലിന്റെ ചൂടിനെ ക്രമീകരിച്ചു ദോശ ഒട്ടിപിടിക്കാതെ നന്നായി ഉണ്ടാക്കി എടുക്കുവാൻ സഹായിക്കും.