ചര്‍മം അറിഞ്ഞ് സണ്‍സ്‌ക്രീന്‍ ഉപയോഗിച്ചില്ലെങ്കില്‍ പണികിട്ടും

ചർമ്മസംരക്ഷണത്തിൽ ഇപ്പോൾ ഒഴിച്ചുകൂടാൻ പറ്റാത്ത സാധനമാണ് സൺസ്ക്രീനുകൾ.

സണ്‍സ്‌ക്രീന്‍ പുരട്ടുന്നത് ശരിയായ രീതിയില്‍ അല്ലെങ്കില്‍ ചര്‍മത്തിന് പണികിട്ടും.

വിലയിലും ബാന്‍ഡിലും മാത്രമല്ല കാര്യം അത് നിങ്ങളുടെ ചര്‍മത്തിന് യോജിച്ചതാണോ എന്നുള്ളതാണ് പ്രധാനം.

സണ്‍സ്ക്രീന്‍ വാങ്ങുമ്പോള്‍ ചില കാര്യങ്ങള്‍ പ്രത്യേകം ശ്രദ്ധിക്കേണ്ടതുണ്ട്.

എണ്ണമയമുള്ളതോ മുഖക്കുരു സാധ്യതയുള്ളതോ ആയ ചര്‍മ്മമുള്ളവർ കട്ടിയുള്ളതും എണ്ണമയമുള്ളതുമായ സൺസ്‌ക്രീനുകൾ ഉപയോ​ഗിക്കരുത്. ഭാരം കുറഞ്ഞ നോൺ-കോമഡോജെനിക് ജെൽ അധിഷ്ഠിത അല്ലെങ്കിൽ പൊടി രൂപത്തിലുള്ള സൺസ്‌ക്രീനുകൾ തിരഞ്ഞെടുക്കുന്നതാണ് നല്ലത്.

സണ്‍സ്ക്രീന്‍ അലര്‍ജി ഉള്ളവരാണെങ്കിൽ സിങ്ക് ഓക്സൈഡ് അല്ലെങ്കിൽ ടൈറ്റാനിയം ഡൈ ഓക്സൈഡ് അടങ്ങിയ മിനറൽ സൺസ്ക്രീനുകൾ ഉപയോ​ഗിക്കുന്നതാണ് നല്ലത്. അവ ചർമത്തിന് മൃദുവും സെൻസിറ്റീവ് ചര്‍മമുള്ളവര്‍ക്ക് സുരക്ഷിതവുമാണ്.

സൺസ്‌ക്രീൻ വിയർപ്പിനൊപ്പം കണ്ണുകളിലേക്ക് ഒലിച്ചിറങ്ങാനുള്ള സാധ്യതയുള്ളതിനാല്‍ കണ്ണിന് ചൊറിച്ചില്‍, കണ്ണുനീര്‍ തുടങ്ങിയ പ്രശ്നങ്ങള്‍ ഉണ്ടാക്കും. ഇത് ഒഴിവാക്കാന്‍ കണ്ണിനു ചുറ്റും സൺസ്‌ക്രീൻ സ്റ്റിക്കുകൾ ഉപയോഗിക്കുക.

ചില സൺസ്ക്രീനില്‍ അടങ്ങിയ ഓക്സിബെൻസോൺ പോലുള്ള ഘടകങ്ങള്‍ ശരീരത്തിലെ ഈസ്ട്രജനെ അനുകരിക്കുന്ന എൻഡോക്രൈൻ ഡിസ്റപ്റ്ററുകളായി പ്രവർത്തിച്ചേക്കാം. ഇത് ഗര്‍ഭിണികള്‍ക്ക് പ്രത്യേകിച്ചും സുരക്ഷിതമാകണമെന്നില്ല. പകരം മിനറൽ അധിഷ്ഠിതവും സുഗന്ധമില്ലാത്തതുമായ ഓപ്ഷനുകൾ തിരഞ്ഞെടുക്കുക.

വരണ്ട ചര്‍മം ഉള്ളവര്‍ ആൽക്കഹോൾ അടങ്ങിയ സണ്‍സ്ക്രീന്‍ ഉപയോഗിക്കുന്നത് ഈർപ്പം ഇല്ലാതാക്കും. സന്തുലിതാവസ്ഥ നിലനിർത്താൻ ഹൈലൂറോണിക് ആസിഡ് അല്ലെങ്കിൽ സെറാമൈഡുകൾ പോലുള്ള അധിക മോയ്‌സ്ചറൈസറുകൾ അടങ്ങിയ ജലാംശം നൽകുന്ന ക്രീമുകൾ തിരഞ്ഞെടുക്കുക.