അടുക്കളയിലെ പാത്രങ്ങൾ തുരുമ്പ് പിടിക്കാതിരിക്കാൻ ചെയ്യേണ്ട കാര്യങ്ങൾ

അമ്മമാരുടെ ഏറ്റവും വലിയ വിഷമമാണ് അടുക്കളയിലെ പാത്രങ്ങൾ തുരുമ്പ് പിടിച്ച് പോകുന്നത്.

ചിലപ്പോൾ അമിതമായി ഉപയോഗിക്കുമ്പോഴും മറ്റ് ചിലപ്പോൾ ശരിയായ പരിചരിക്കാത്തതുമൊക്കെ ഇതിന് കാരണമാകാറുണ്ട്.

പാത്രങ്ങൾ തുരുമ്പു പിടിക്കാതിരിക്കാൻ ശ്രദ്ധിക്കേണ്ട ചില കാര്യങ്ങളിതാ.

ഭക്ഷണമുണ്ടാക്കി എത്ര ക്ഷീണിച്ചാലും വേഗത്തിൽ പാത്രങ്ങൾ വ്യത്തിയാക്കാൻ ശ്രമിക്കുക. കാരണം ദീർഘനേരം ഭക്ഷണം പാകം ചെയ്ത പാത്രങ്ങൾ സിങ്കിലിടുന്നത് അതിൽ തുരുമ്പുണ്ടാകാൻ കാരണമാകും.

പാചകം ചെയ്ത പാത്രങ്ങൾ ചൂട് വെള്ളത്തിൽ മുക്കി വയ്ക്കുകയാണെങ്കിൽ തുരുമ്പ് പെട്ടെന്ന് ഉണ്ടാകാതിരിക്കാൻ സഹായിക്കും. പാചകം ചെയ്ത് ക്ഷീണിക്കുന്നവർ അങ്ങനെ ചെയ്യുന്നത് ഉചിതമായിരിക്കും.

കാർബൺ സ്റ്റീലോ അല്ലെങ്കിൽ ഇരുമ്പ് പാത്രങ്ങൾ കഴുകി വ്യത്തിയാക്കി ഉണക്കിയ ശേഷം അതിൽ അൽപ്പം എണ്ണ പുരട്ടി വയ്ക്കാൻ ശ്രമിക്കണം. ഇത് ഈർപ്പത്തെ കളയാനും പാത്രം തുരുമ്പിക്കാതിരിക്കാനും സഹായിക്കുന്നു.

പാത്രങ്ങൾ വിനാഗിരിയിലോ നാരങ്ങാവെള്ളത്തിലോ കഴുകുന്നതായിരിക്കും തുരുമ്പ് എടുക്കാതിരിക്കാനുള്ള എളുപ്പ മാ‍ർഗം. ഇവ രണ്ടും അസിഡിറ്റി ഉള്ളതാണ്, ഇത് തുരുമ്പിനെ അലിയിക്കാൻ സഹായിക്കുന്നു.

പാത്രങ്ങൾ നന്നായി കഴുകി അഴുക്ക് എല്ലാം കളഞ്ഞ ശേഷം ടിഷ്യുവോ അല്ലെങ്കിൽ ടവ്വലോ ഉപയോഗിച്ച് തുടച്ച് വ്യത്തിയാക്കുക. ഷെൽഫുകൾക്കുള്ളിൽ സൂക്ഷിക്കുന്നതിന് മുമ്പ് അവ പൂർണ്ണമായും ഉണങ്ങാൻ ഫാനിൻ്റെ അടിയിലോ അല്ലെങ്കിൽ വെയിലത്തോ വയ്ക്കാം.

പാചകത്തിന് ഇരുമ്പ് പാത്രങ്ങളാണ് ഉപയോഗിക്കുന്നതെങ്കിൽ ദീർഘനേരത്തേക്ക് അതിൽ ദ്രാവകങ്ങൾ സൂക്ഷിക്കാതിരിക്കാൻ ശ്രമിക്കുക. ഇത് ഒരു ഉത്തേജകമായി പ്രവർത്തിക്കുകയും പാത്രങ്ങൾ വേഗത്തിൽ തുരുമ്പെടുക്കാൻ ഇടയാക്കുകയും ചെയ്യും.

ഇരുമ്പ് പാത്രത്തിൽ തക്കാളി പോലുള്ള ഉപ്പും അമ്ലതയും ഉള്ള ചേരുവകൾ പാകം ചെയ്തിട്ടുണ്ടെങ്കിൽ ഉടൻ വൃത്തിയാക്കണം. ആസിഡുകൾക്ക് തുരുമ്പ് നീക്കം ചെയ്യാൻ കഴിയുമെങ്കിലും, അവ പാചകം ചെയ്യുന്നത് പാത്രത്തെ നശിപ്പിക്കും.