മാംസം ഫ്രിഡ്ജിൽ സൂക്ഷിക്കുമ്പോൾ ശ്രദ്ധിക്കേണ്ട കാര്യങ്ങൾ

മീനും മാംസവും പലരും ദിവസങ്ങളോളം ശീതീകരിച്ചു സൂക്ഷിക്കാറുണ്ട്.

ശരിയായ രീതിയിൽ മാംസം സൂക്ഷിച്ചില്ലെങ്കിൽ പഴകി പോകാൻ സാധ്യതയുണ്ട്.

ഭക്ഷണ സാധനങ്ങൾ ശീതീകരിക്കുമ്പോൾ മാംസത്തിന്റെ കാര്യത്തിലാണ് ഏറ്റവും കൂടുതൽ ശ്രദ്ധ ചെലുത്തേണ്ടത്.

മാംസം ഫ്രിഡ്ജിൽ സൂക്ഷിക്കുമ്പോൾ ശ്രദ്ധിക്കേണ്ട കാര്യങ്ങൾ എന്തൊക്കെയാണെന്ന് നോക്കാം.

കൈകൾ, കത്തി, കട്ടിങ് ബോർഡ് എന്നിവ നന്നായി കഴുകിയ ശേഷം മാത്രം മാംസം അരിയാം. വൃത്തിയുള്ള ഉപകരണങ്ങൾ ഉപയോഗിക്കുന്നത് ബാക്ടീരിയയിലൂടെയുണ്ടാകുന്ന മലിനീകരണം തടയാൻ സഹായിക്കും.

മാംസം വൃത്തിയാക്കി രക്തവും മറ്റും നീക്കം ചെയ്ത ശേഷം മാത്രം ഫ്രിഡ്ജിൽ സൂക്ഷിക്കേണ്ടതാണ്.

മാംസം ചെറിയ ഭാഗങ്ങളായി മുറിച്ച് സൂക്ഷിക്കുന്നത് ഉപയോഗിക്കാനും ഡിഫ്രോസ്റ്റ് ചെയ്യാനും എളുപ്പമാകും.

ഫ്രീസറിൽ -18°C-ന് താഴെയുള്ള താപനിലയിൽ എയർടൈറ്റ് പാത്രങ്ങളിലോ ഫ്രീസർ ബാഗുകളിലോ മാംസം സൂക്ഷിക്കുക. ഇത് ഫ്രീസർ ബേൺ തടയുകയും മാംസത്തിന്റെ രുചിയും ഗുണനിലവാരവും നിലനിർത്തുകയും ചെയ്യും.

ഫ്രിഡ്ജിൽ സൂക്ഷിച്ച് വെച്ചിരിക്കുന്ന ഓരോ പാക്കറ്റിലും തീയതി എഴുതി വയ്ക്കുന്നത് എപ്പോൾ എടുത്ത് വെച്ചതാണെന്ന് തിരിച്ചറിയാൻ സഹായിക്കും.

പാചകത്തിനായി എടുക്കുന്നതിന് 24 മണിക്കൂർ മുമ്പ് ഫ്രീസറിൽ നിന്ന് മാറ്റി വെക്കാം. പെട്ടന്നുള്ള ഡിഫ്രോസ്റ്റിംഗിനായി ചെറു ചൂടുവെള്ളത്തിൽ മുക്കിവെയ്ക്കാം. മൈക്രോവേവ് ഉപയോഗിക്കുന്നതും ഒഴിവാക്കാം, ഇത് മാംസത്തിന്റെ ഗുണനിലവാരം കുറയ്ക്കും.

എണ്ണ, അല്ലെങ്കിൽ വിനാഗിരി ഉപയോഗിച്ച് മാംസം മാരിനേറ്റ് ചെയ്ത് സൂക്ഷിക്കുന്നത് രുചി വർധിപ്പിക്കുക മാത്രമല്ല, ബാക്ടീരിയയുടെ വളർച്ച തടയാനും സഹായിക്കും.