വ്യായാമം ചെയ്യാതിരുന്നാൽ ശരീരത്തെ ബാധിക്കുന്നത് ഇങ്ങനെയെല്ലാം

പതിവായി വ്യായാമം ചെയ്യേണ്ടത് ഇപ്പോഴത്തെ ജീവിതശൈലിയിൽ നിര്‍ബന്ധമാണ്.

ശരീരം അധികം അനങ്ങാതെയുള്ള ജോലി ചെയ്യുന്നവരെല്ലാം വ്യായാമം ചെയ്തില്ലെങ്കില്‍ അത് ശരീരത്തിന് വലിയ പണിയാണ് കൊടുക്കുക.

വ്യായാമമില്ലാതെ ഏറെ നാള്‍ തുടര്‍ന്നാല്‍ എന്തെല്ലാം നെഗറ്റീവ് ആയ മാറ്റങ്ങളാണ് അത് ശരീരത്തിലുണ്ടാക്കുക എന്ന് നോക്കാം.

വ്യായാമമില്ലാതെ ഏറെ നാള്‍ തുടരുന്നത് ഹൃദയത്തിന് മേല്‍ വെല്ലുവിളി ഉയര്‍ത്തും. കൊറോണറി ഹാര്‍ട്ട് ഡിസീസ് അടക്കമുള്ള ഹൃദ്രോഗങ്ങള്‍ക്കുള്ള സാധ്യതയേറുന്നു. ഹൃദയാഘാതം പോലെയുള്ള കടുത്ത അവസ്ഥയിലേക്ക് വരെ അത് വീണ്ടും സാധ്യത ഉയര്‍ത്തുന്നു.

അമിതവണ്ണത്തിനും വ്യായാമമില്ലായ്മ കാരണമാകുന്നു. അമിതവണ്ണമാണെങ്കില്‍ അനുബന്ധമായി പല അസുഖങ്ങളിലേക്കും ആരോഗ്യപ്രശ്നങ്ങളിലേക്കുമെല്ലാം നമ്മെ നയിക്കാം.

വ്യായാമമില്ലാതെ തുടരുന്നവരില്‍ ടൈപ്പ് 2 പ്രമേഹം പിടിപെടാൻ സാധ്യത ഏറെയാണ്. കാരണം കായികാധ്വാനമോ വ്യായമമോ ഇല്ലാതെ തുടരുമ്പോള്‍ ഇൻസുലിൻ ഹോര്‍മോണ്‍ വേണ്ടവിധം ഉപയോഗിക്കാൻ ശരീരത്തിന് കഴിയാതിരിക്കുന്നു. ഇതിനാല്‍ രക്തത്തിലെ ഷുഗര്‍ നില ഉയരാം.

പ്രമേഹം പോലെ തന്നെ വ്യായാമമില്ലായ്മ കൊളസ്ട്രോളിലേക്കും നയിക്കാം. കായികാധ്വാനമില്ലാതിരിക്കുമ്പോള്‍ ശരീരത്തില്‍ ചീത്ത കൊഴുപ്പ് അടിഞ്ഞുകൂടുകയും അതിന്‍റെ ഭാഗമായി കൊളസ്ട്രോള്‍ പിടിപെടുകയുമാണ് ചെയ്യുന്നത്.

കായികാധ്വാനമോ വ്യായാമമോ ഇല്ലാതെ തുടരുന്നത് മാനസികാരോഗ്യത്തെയും നെഗറ്റീവായി ബാധിക്കും. ആത്മവിശ്വാസക്കുറവ്, കുറഞ്ഞ ഉത്പാദനക്ഷമത, ഉള്‍വലിയല്‍ എന്നിങ്ങനെ പല പ്രശ്നങ്ങളും വ്യായാമമില്ലായ്മ മൂലം ഉണ്ടാകാം.