നല്ല ആരോഗ്യത്തിന് എത്ര മണിക്കൂർ ഉറങ്ങണം?

ആരോഗ്യം നിലനിർത്താൻ നല്ല ഭക്ഷണവും വ്യായാമവും മാത്രം പോര.

ദിവസവും ലഭിക്കുന്ന ഉറക്കത്തിന്റെ അളവും ഗുണനിലവാരവും അത്ര തന്നെ പ്രധാനമാണ്.

എന്നാൽ ദിവസവും എത്ര മണിക്കൂർ ഉറങ്ങണം എന്ന ചോദ്യം പലർക്കുമുണ്ട്.

ചിലർക്ക് ആറുമണിക്കൂർ ഉറക്കം മതിയാകും. മറ്റുചിലർ എട്ട് മുതൽ ഒൻപത് മണിക്കൂർ വരെ ഉറങ്ങണം.

എന്നാൽ യഥാർഥത്തിൽ പ്രായം, ജീവിതശൈലി, ആരോഗ്യസ്ഥിതി എന്നിവയെ ആശ്രയിച്ചാണ് ശരിയായ ഉറക്കസമയം തീരുമാനിക്കുന്നത്.

മതിയായ ഉറക്കം ലഭിക്കാത്തത് ഹൃദ്രോഗം, പ്രമേഹം, അമിതവണ്ണം, മാനസിക സമ്മർദ്ദം, ഓർമ്മക്കുറവ് തുടങ്ങിയ നിരവധി ആരോഗ്യപ്രശ്നങ്ങളുടെ സാധ്യത വർധിപ്പിക്കുമെന്ന് പഠനങ്ങൾ വ്യക്തമാക്കുന്നു.

18 മുതൽ 64 വയസ് വരെയുള്ള മുതിർന്നവർക്ക് സാധാരണയായി ഏഴ് മുതൽ ഒമ്പത് മണിക്കൂർ വരെ ഉറക്കമാണ് നിർദേശിക്കുന്നത്.

65 വയസിന് മുകളിലുള്ളവർക്ക് ഏഴ് മുതൽ എട്ട് മണിക്കൂറും, കൗമാരക്കാർക്ക് എട്ട് മുതൽ 10 മണിക്കൂറും ഉറക്കം ആവശ്യമാണ്.

എന്നാൽ ഈ കണക്കുകൾ എല്ലാവർക്കും ഒരുപോലെയല്ല എന്ന് ഓർക്കണം. നിങ്ങളുടെ ശരീരത്തിന് എത്ര മണിക്കൂർ ഉറക്കം വേണമെന്ന് നിങ്ങളുടെ ശാരീരിക അവസ്ഥകളാണ് തീരുമാനിക്കുന്നത്.