ഭക്ഷണം അടിയിൽ പിടിച്ചോ? അതോ കരിഞ്ഞു പോയോ? ടെൻഷനടിക്കേണ്ട, ഇങ്ങനെ ചെയ്താൽ മതി

ആദ്യമായി പാചകം ചെയ്യുന്നവർക്കും പാചകത്തിൽ എക്സ്പേർട്ട് ആയവർക്കും ഒരു പോലെ പറ്റുന്ന ഒരു അബദ്ധമാണ് ഭക്ഷണമുണ്ടാക്കുമ്പോൾ കരിഞ്ഞ് പോകുക അല്ലെങ്കിൽ പാത്രത്തിന്റെ അടിയിൽ പിടിച്ച് പോകുക എന്നത്.

മിക്കവാറും അവസരങ്ങളിൽ ഇങ്ങനെയായ ഭക്ഷണം പൂർണമായിട്ടും എടുത്തു കളയാറാണ് പതിവ്. കാരണം പുകഞ്ഞ ചുവ ഉള്ളതുകൊണ്ട് പിന്നീട് അത് കഴിക്കാൻ പറ്റില്ല.

‌എങ്കിൽ ഈ കരിഞ്ഞ കറിയിൽ നിന്ന് കരിഞ്ഞ ഭാഗം എടുത്തുമാറ്റി അതിന്റെ പുകച്ചുവ മാറ്റി രുചികരമാക്കിയാലോ?

അതിനുള്ള ചില ടിപ്സുകൾ നോക്കാം.

കറികൾ കരിഞ്ഞ് അടിയിൽ പിടിക്കുകയാണെങ്കിൽ ആ ഭാഗം മാത്രം എടുത്ത് മാറ്റുക.ബാക്കിയുള്ള കറിയിലേക്ക് സവാളയും തക്കാളിയും വഴറ്റി ചേർക്കുക. കറിയിലെ കരിഞ്ഞ ചുവയും മണവും കുറയും.

തേങ്ങാപ്പാൽ ചേർത്ത കറിയാണ് അടിയിൽ പിടിച്ചതെങ്കിൽ കുറച്ചുകൂടി തേങ്ങാപ്പാൽ ചേർത്താൽ മതി. ഇങ്ങനെ ചെയ്യുമ്പോൾ പുകച്ചവയുള്ളതു കുറഞ്ഞ് കറി കുറച്ചുകൂടി രുചികരമായി മാറും.

ബിരിയാണിയാണ് കരിഞ്ഞ് പിടിച്ചിരിക്കുന്നത് എങ്കിൽ അതിലെ കരിയാത്ത ഭാഗം മറ്റൊരു പാത്രത്തിലേക്ക് എടുത്തു മാറ്റുക അതിനുശേഷം അതിലേക്ക് ഒരു കഷ്ണം ബ്രെഡ് അല്ലെങ്കിൽ രണ്ടായിട്ട് മുറിച്ച ഒരു കഷണം സവാളയോ വെച്ച് ഒരു 10 മിനിറ്റ് അടച്ചുവെക്കുക അങ്ങനെ ചെയ്താൽ കരിച്ചുവ ഈ സവാള അല്ലെങ്കിൽ ഈ ബ്രെഡിന്റെ പീസ് വലിച്ചെടുക്കും.

ഇതു കൂടാതെ കുറച്ചു ബേലീഫ് ചേർത്തു നന്നായിട്ട് സ്റ്റീം ചെയ്യുകയാണെങ്കിൽ കരിഞ്ഞ മണവും ചുവയും കുറച്ചു കൂടി കുറയും.

ഇറച്ചിയാണ് അടിയിൽ പിടിച്ചതെങ്കിൽ അടിയിൽ പിടിച്ച ഭാഗം എടുത്തു മാറ്റിയശേഷം കരിയാത്ത ഭാഗത്തിലേക്ക് ഒരു കഷ്ണം ബട്ടറോ അല്ലെങ്കിൽ ഒരു മുറി നാരങ്ങനീരോ പുരട്ടുക. ഇങ്ങനെ ചെയ്താൽ കരിഞ്ഞ ടെസ്റ്റ് കുറയ്ക്കാൻ സാധിക്കും.

യോഗർട്ട് അല്ലെങ്കിൽ ക്രീമോ ചേർത്തുള്ള കറികളാണ് അടിയിൽ പിടിച്ചതെങ്കിൽ അടിയിൽ പിടിക്കാത്ത ഭാഗം മറ്റൊരു പാത്രത്തിലേക്ക് എടുത്ത് മാറ്റി അതിലേക്ക് കുറച്ചുകൂടി യോഗർട്ടും അല്ലെങ്കിൽ ക്രീമും ചേർത്ത് നന്നായിട്ട് മിക്സ് ചെയ്യുക. അപ്പോൾ കറിക്ക് ഒരു ഫ്രഷ് ടേസ്റ്റ് ഉണ്ടാകും.

അടിയിൽ പിടിച്ച കറിയിലേക്ക് ഒരു ഉരുളക്കിഴങ്ങിന്റെ കഷ്ണം ഇടുക. ഉരുളക്കിഴങ്ങ് കഷണം പുകച്ചുവ മുഴുവനും വലിച്ചെടുക്കും. കറിക്ക് പഴയ രുചി തിരിച്ചുകിട്ടുകയും ചെയ്യും. കറി വിളമ്പുന്നതിനു മുൻപ് ഈ കിഴങ്ങ് കഷണം എടുത്ത് മാറ്റിയാൽ മതി.

മീൻ കറിയാണ് കരിഞ്ഞു പിടിച്ചതെങ്കിൽ തേങ്ങയുടെ ഒന്നാം പാൽ കുറച്ച് ചേർക്കുക.

മുളകിട്ട മീൻകറിയാണെങ്കിൽ പുളി വെള്ളം കുറച്ച് കൂടി ചേർക്കുക അല്ലെങ്കിൽ രണ്ട് തക്കാളി കഷണം ഇട്ട് 5–7 മിനിറ്റ് അടച്ച് വേവിക്കുക.