പെർഫക്റ്റ് ആയി മീൻ ഫ്രൈ ചെയ്യാം

ചോറ് കഴിക്കുമ്പോൾ ഒരു മീൻ ഫ്രൈ ഉണ്ടായിരുന്നെങ്കിലെന്ന് കൊതിക്കാത്തവർ കുറവാണ്. കാരണം മീൻ കറിയെക്കാൾ മിക്കവർക്കും പ്രിയം ഫ്രൈ തന്നെയാണ്.

പക്ഷെ വീട്ടിൽ മീൻ ഫ്രൈ ഉണ്ടാക്കുമ്പോൾ‌ മിക്ക സമയങ്ങളിലും കടയിൽ നിന്ന് കിട്ടുന്നത് പോലെ സോഫ്റ്റും പെർഫക്റ്റും ആകാറില്ല.

കുറച്ച് കാര്യങ്ങൾ ശ്രദ്ധിച്ചാൽ നിങ്ങൾക്കും കടയിൽ കിട്ടുന്നത് പോലെ പെർഫക്റ്റ് ആയി മീൻ ഫ്രൈ ചെയ്യാവുന്നതാണ്

മീന്‍ ഫ്രൈ ചെയ്യുവാൻ വേണ്ടി മുറിക്കുമ്പോൾ കൃത്യമായ അളവിൽ ഒരുപോലെ മുറിക്കുക. അസമമായ അളവില്‍ മുറിച്ചാൽ വേവ് പലതാകാന്‍ കാരണമാകും.

മീൻ പച്ചവെള്ളത്തില്‍ കല്ല് ഉപ്പ് ഉപയോ​ഗിച്ച് കഴുകുക. ഇത് മീന്‍ പെട്ടെന്ന് വൃത്തിയാകാന്‍ സഹായിക്കും.

കിച്ചണ്‍ പേപ്പര്‍ വെച്ച് മീനിലെ ഈര്‍പ്പം കളയുക. മീനിലെ ഈര്‍പ്പം നീരാവി ഉണ്ടാകാനും, ഇതുമൂലം പാനില്‍ മീനിന്റെ തൊലി പറ്റിപ്പിടിക്കുവാനും കാരണമാകുന്നു.

മസാല തയ്യാറാക്കി മീനില്‍ പുരട്ടി 10-15 മിനിറ്റെങ്കിലും വയ്ക്കണം. അതുപോലെ മീൻ ഫ്രൈ ചെയ്യുന്നതിന് തൊട്ടുമുമ്പ് മാത്രം ഉപ്പിടുന്നതാണ് നല്ലത്. വളരെ നേരത്തെ ചേർത്താൽ മീൻ വഴുക്കലുള്ളതായിരിക്കും.

മീന്‍ ഫ്രൈ ചെയ്യാൻ ഇരുമ്പ് തവ അല്ലെങ്കില്‍ നോണ്‍-സ്റ്റിക്ക് പാത്രം തെരഞ്ഞെടുക്കുന്നതാണ് നല്ലത്.

മീൻ ഫ്രൈ ചെയ്യുമ്പോൾ രുചികൂടാൻ വെളിച്ചെണ്ണ ഉപയോ​ഗിക്കുക. കുറച്ച് കറിവേപ്പില കൂടി വെളിച്ചെണ്ണയിൽ ഇടുകയാണെങ്കിൽ കുറച്ചുകൂടി രുചി കിട്ടും.

എണ്ണ നല്ലതു പോലെ ചൂടായ ശേഷം മീന്‍ ഇടാം. താപനില 175 ഡിഗ്രി സെൽഷ്യസിനും 190 ഡിഗ്രി സെൽഷ്യസിനും ഇടയിലായിരിക്കണം. എണ്ണയിൽ ഒരു നുള്ള് റവ ഇട്ട് പരീക്ഷിക്കാം. അത് തിളച്ചുമറിയുകയും പെട്ടെന്ന് ഉയരുകയും ചെയ്താൽ, എണ്ണ ചൂടായെന്നാണ് അര്‍ത്ഥം.

അരികുകൾ സ്വർണ്ണനിറമാകുകയും മീന്‍ പാനില്‍ നിന്ന് ഇളകിവരാന്‍ തുടങ്ങുകയും ചെയ്യുമ്പോൾ മാത്രം മറിക്കുക. മറിച്ചതിനു ശേഷം ചൂട് ചെറുതായി കുറയ്ക്കുക. ഇത് മീനിന്‍റെ ഉള്‍ഭാഗം വേകാന്‍ സഹായിക്കും