സദ്യയ്ക്ക് കിട്ടുന്നത് പോലുള്ള രുചിയുള്ള സാമ്പാര്‍ വീട്ടിലും ഉണ്ടാക്കാം

എത്ര നമ്മൾ വീട്ടിൽ സാമ്പാർ ഉണ്ടാക്കാൻ ശ്രമിച്ചാലും അതിന് കല്യാണ വീട്ടിലെ സാമ്പാറിന്റെ രുചിയോ മണമോ ഒന്നും കിട്ടാറില്ല.

നല്ല കൊഴുത്ത നല്ല മണമുള്ള സാമ്പാറാണല്ലോ കല്യാണസാമ്പാറിന്റെ ഹൈലൈറ്റ് എന്ന് പറയുന്നത്.

ചില ടിപ്പുകൾ പരീക്ഷിച്ചാല്‍ കൊഴുപ്പും മണവുമുള്ള നല്ല സാമ്പാര്‍ വീട്ടിലും ഉണ്ടാക്കാം.

സാമ്പാര്‍ ഉണ്ടാക്കുമ്പോള്‍ പരിപ്പിനൊപ്പം ഒരു സ്പൂണ്‍ ഉണക്കലരി പൊടിച്ചത് കൂടി ചേര്‍ത്താല്‍ മതി സാമ്പാറിന് നല്ല കൊഴുപ്പ് ലഭിക്കും.

പരിപ്പ് വേവിക്കുന്നതിനോടൊപ്പും കുറച്ച് വലിയ ഉള്ളി അരിഞ്ഞതും,വെളിച്ചെണ്ണയും,കറിവേപ്പിലയും ചേർക്കുകയാണെങ്കിൽ പ്രത്യേക രുചിയും മണവും ലഭിക്കും.

സാമ്പാർ ഉണ്ടാക്കുമ്പോൾ പുളിയുടേയും ഉപ്പിന്റേയും അളവ് കൃത്യമായിരിക്കണം.

സാമ്പാറിന് കൊഴുപ്പ് കുറവായി തോന്നുകയാണെങ്കിൽ അതിലേക്ക് ഒന്ന് രണ്ട് ചേമ്പിൻ കഷ്ണം ചേര്‍ത്താൽ നല്ല കൊഴുപ്പ് കിട്ടും.

തക്കാളി പുഴുങ്ങിയ ശേഷം അടിച്ചെടുത്തത് സാമ്പാറില്‍ ചേര്‍ത്താല്‍ കൊഴുപ്പ് കിട്ടും.

സാമ്പാര്‍ പാകമായി വരുമ്പോള്‍ ഉരുളക്കിഴങ്ങ് പുഴുങ്ങി ഉടച്ച് ചേര്‍ക്കുന്നത് കൊഴുപ്പ് കൂട്ടുന്നതിന് നല്ലതാണ്.

തിളച്ച് വരുമ്പോള്‍ തന്നെ മല്ലിയില കറിവേപ്പില്ല എന്നിവ കുനുകുനാ ചേര്‍ത്താല്‍ സാമ്പാറിന് നല്ല മണം ലഭിക്കും.

സാമ്പാറിലേക്ക് ഉപയോ​ഗിക്കേണ്ട പച്ചക്കറികൾ (ഉരുളക്കിഴങ്ങ് ഒഴികെ) നല്ല വെളിച്ചെണ്ണയിൽ വഴറ്റിയെടുക്കന്നത് രുചി കൂട്ടും.

സാമ്പാർ താളിച്ചിടുന്നതിനോടൊപ്പം കുറച്ച് സാമ്പാർ പൊടിയും അതിനോടൊപ്പം ഇടുന്നത് നല്ല മണം ലഭിക്കും. സാമ്പാർപൊടി കരിഞ്ഞുപോകാതെ ശ്രദ്ധിക്കണം.

സാമ്പാർ ഉണ്ടാക്കുമ്പോൾ ഫ്രഷായിട്ടുള്ള പച്ചക്കറികൾ ഉപയോ​ഗിക്കുക. വാടിയതോ പഴകിയിതോ ആയ പച്ചക്കറികൾ സാമ്പാറിന്റെ രുചി ഇല്ലാതാക്കും.