അണുബാധകളിൽ നിന്ന് രക്ഷപ്പെട്ട് സുരക്ഷിതമായി യാത്ര ചെയ്യാം

ഇന്ന് ഷിഗെല്ല പോലുള്ള ബാക്ടീരിയ മൂലമുള്ള രോഗങ്ങൾ, ഭക്ഷ്യവിഷബാധ, മറ്റ് ജലജന്യ അണുബാധകൾ എന്നിവ എന്നിവ പല പ്രദേശങ്ങളിലും വർധിച്ചുവരുന്ന സാഹചര്യമാണ് കാണുന്നത്.

മലിനജലം, ശുചിത്വക്കുറവ്, പുറത്തുനിന്നുള്ള സുരക്ഷിതമല്ലാത്ത ഭക്ഷണം എന്നിവയാണ് ഇത്തരം രോഗങ്ങളുടെ പ്രധാന കാരണങ്ങൾ.

പ്രത്യേകിച്ച് യാത്രകളിൽ ഭക്ഷണ-ജല ശുചിത്വം പാലിക്കാത്തത് രോഗവ്യാപന സാധ്യത കൂടുതലാക്കുന്നു.

അതിനാൽ യാത്ര ചെയ്യുമ്പോൾ സ്വീകരിക്കേണ്ട ജാ​ഗ്രത നിർദ്ദേശങ്ങൾ എന്തെല്ലാമെന്ന് നോക്കാം.

ശുദ്ധജലം മാത്രം കുടിക്കുക

യാത്രയ്ക്കിടെ കുപ്പിവെള്ളം മാത്രം ഉപയോഗിക്കുക.വീഥികളിൽ ലഭിക്കുന്ന ഫിൽറ്റർ ചെയ്യാത്ത വെള്ളം, ഐസ് ചേർത്ത പാനീയങ്ങൾ എന്നിവ ഒഴിവാക്കുക. ഷിഗെല്ല പോലുള്ള ബാക്ടീരിയ മലിനജലത്തിലൂടെയാണ് കൂടുതലായി പടരുന്നത്.

ഭക്ഷണ ശുചിത്വം ഉറപ്പാക്കുക

പൂർണ്ണമായി പാകം ചെയ്ത ചൂടുള്ള ഭക്ഷണം മാത്രം കഴിക്കുക.സ്ട്രീറ്റ് ഫുഡുകൾ,തുറന്ന് വെച്ചിരിക്കുന്ന ഭക്ഷണങ്ങൾ എന്നിവ ഒഴിവാക്കുക. ഭക്ഷണം കഴിക്കുന്നതിന് മുമ്പ് കൈകൾ ശുചിയായി കഴുകുന്നത് അനിവാര്യമാണ്.

കൈ ശുചിത്വം

യാത്രയിൽ സോപ്പ് ഉപയോഗിച്ച് കൈ കഴുകാനുള്ള അവസരം ഇല്ലെങ്കിൽ സാനിറ്റൈസർ ഉപയോഗിക്കുക.ഭക്ഷണം കഴിക്കുന്നതിന് മുമ്പും ടോയ്ലറ്റ് ഉപയോഗിച്ചതിന് ശേഷവും കൈ ശുചിത്വം പാലിക്കുക.

വ്യക്തിഗത വസ്തുക്കൾ പങ്കിടരുത്

തൂവാല, കുപ്പി, ഭക്ഷണോപകരണങ്ങൾ എന്നിവ മറ്റുള്ളവരുമായി പങ്കിടുന്നത് ഒഴിവാക്കുക. ഇത് അണുബാധ പകരാനുള്ള സാധ്യത കുറയ്ക്കും.

കുട്ടികളിൽ പ്രത്യേക ശ്രദ്ധ

കുട്ടികൾ കൈകൾ വായിലിടുന്ന ശീലം ഉള്ളതിനാൽ അവരിൽ രോഗവ്യാപനം വേഗത്തിൽ സംഭവിക്കാം. അതിനാൽ അവരുടെ കൈ ശുചിത്വം കർശനമായി പാലിക്കണം.

രോഗലക്ഷണങ്ങൾ ശ്രദ്ധിക്കുക

വയറിളക്കം, വയറുവേദന, പനി, ഛർദ്ദി തുടങ്ങിയ ലക്ഷണങ്ങൾ കണ്ടാൽ സ്വയം മരുന്ന് കഴിക്കാതെ ഉടൻ ഡോക്ടറെ സമീപിക്കുക. ഷിഗെല്ല പോലുള്ള അണുബാധകൾ ചിലപ്പോൾ ഗുരുതരമായ ഡീഹൈഡ്രേഷനിലേക്ക് നയിക്കാം.

സുരക്ഷിതമായ യാത്രാ ഭക്ഷണം ഒരുക്കുക

ദീർഘയാത്രകൾക്ക് വീട്ടിൽ തയ്യാറാക്കിയ സുരക്ഷിത ഭക്ഷണം കൊണ്ടുപോകുന്നത് നല്ലതാണ്. ഇത് പുറത്തുനിന്നുള്ള മലിനഭക്ഷണത്തെ ഒഴിവാക്കാൻ സഹായിക്കും.

ആരോഗ്യ ശീലങ്ങൾ പാലിക്കുക

തുമ്മുമ്പോഴും ചുമയ്ക്കുമ്പോഴും വായും മൂക്കും മൂടുക, ശുചിത്വപരമായ ജീവിതശൈലി തുടരുക.