കുഞ്ഞൻ തവളകളെക്കൊണ്ട് ശല്യമായോ? എങ്ങനെ ഒഴിവാക്കാം?

മഴക്കാലമായാൽ മിക്ക വീടുകളിലും കാണുന്നതാണ് കുഞ്ഞൻ തവളകൾ.

മഴയുടെ തുടക്കസമയത്ത് കുഞ്ഞൻ അതിഥികളെ കാണുന്നത് കൗതുകമാണെങ്കിലും സ്ഥിരമാകുമ്പോൾ ആർക്കുമത്ര ഇഷ്ടപ്പെടാറില്ല.

മഴക്കാലത്ത് വീട്ടിൽ കയറിവരുന്ന തവളകളിൽ ഭൂരിഭാഗവും ബുഷ് ഫ്രോഗ്സ് അഥവാ ഇലത്തവളകളാണ്.

അൽപം നനവുള്ള എന്നാൽ വരണ്ടതുമായ, സ്ഥലങ്ങൾ അവർക്ക് സുരക്ഷിതമായ ഇടങ്ങളാണ്.

ഇവയെ തുരത്താൻ എന്തെല്ലാം ചെയ്യാമെന്ന് നോക്കാം.

വിടവുകൾ അടയ്ക്കുക

വാതിലുകളും ജനലുകളും കൃത്യമായി അടച്ചിടാൻ ശ്രദ്ധിക്കുക. വാതിലുകൾക്കിടയിലെ വിള്ളലുകൾ അടയ്ക്കുക. ഈ വിള്ളലുകളിലൂടെ ഇവ വീട്ടിനുള്ളിലേക്ക് വരാൻ സാധ്യത കൂടുതലാണ്.

ലൈറ്റുകൾ ഓഫ് ചെയ്യുക

ഔട്ട്ഡോർ ലൈറ്റുകൾ പ്രാണികളെ ആകർഷിക്കുന്നു. ഇത്തരം പ്രാണികൾ തവളകളെയും ആകർഷിക്കും. അതുകൊണ്ട് അത്യയാവശ്യമില്ലാത്തപ്പോൾ ലൈറ്റ് അണച്ചിടാം.

വീട്ടിലെ വരാന്ത വരണ്ടതായി സൂക്ഷിക്കാം

വീട്ടിലേക്ക് കയറുന്ന വാതിലുകൾക്കുചുറ്റും വെള്ളം തളംകെട്ടിനിൽക്കുന്നില്ലെന്ന് ഉറപ്പാക്കുക. ഉണങ്ങിയ വരാന്ത തവളകളെ അത്രയ്ക്ക് ആകർഷിക്കാറില്ല.

ചെടികൾ വെട്ടിമാറ്റാം

വാതിലുകൾക്ക് സമീപമുള്ള കുറ്റിച്ചെടികളും കുറ്റിക്കാടുകളും തവളകൾക്ക് എളുപ്പത്തിൽ മറവ് നൽകുന്നു.സാധ്യമെങ്കിൽ അവ വീടിന് പിന്നിലേക്ക് മാറ്റുകയോ വെട്ടിക്കളയുകയോ ചെയ്യാം.