കുക്കുമ്പർ കയ്പുള്ളതാണോ? വാങ്ങുന്നതിന് മുമ്പ് ഇങ്ങനെ പരിശോധിക്കൂ

ദിവസേനയുള്ള ഭക്ഷണത്തിൽ എളുപ്പത്തിൽ ഉൾപ്പെടുത്താവുന്ന വളരെ ആരോഗ്യകരമായ ഒരു പച്ചക്കറിയാണ് കുക്കുമ്പർ.

എന്നാൽ പലർക്കും ഉണ്ടാകുന്ന ഒരു പ്രശ്നമാണ് വാങ്ങിയ കുക്കുമ്പർ മുറിച്ച് കഴിക്കുമ്പോൾ കയ്പ് തോന്നുന്നത്.

അതിനാൽ മാർക്കറ്റിൽ നിന്ന് കുക്കുമ്പർ വാങ്ങുമ്പോൾ തന്നെ അതിന്റെ ഗുണനിലവാരം തിരിച്ചറിയാൻ കഴിയുന്നത് വളരെ പ്രധാനമാണ്.

കുക്കുമ്പറിന്റെ കയ്പിന് പ്രധാന കാരണം കുക്കുർബിറ്റാസിൻ എന്ന പ്രകൃതിദത്ത സംയുക്തമാണ്. ചില സാഹചര്യങ്ങളിൽ ഇത് കൂടുതലായി രൂപപ്പെടുമ്പോഴാണ് കുക്കുമ്പറിന് കയ്പ് അനുഭവപ്പെടുന്നത്.

എങ്ങനെ കയ്പില്ലാത്ത കുക്കുമ്പർ കടയിൽ‌ നിന്നും തിരഞ്ഞെടുക്കാം എന്ന് നോക്കാം.

നല്ല കുക്കുമ്പറിന് ഒരേപോലെയുള്ള പച്ചനിറമായിരിക്കും. മഞ്ഞനിറമോ പാടുകളോ കണ്ടാൽ അത് പഴുത്തതോ ഗുണനിലവാരം കുറഞ്ഞതോ ആയിരിക്കാം. അത്തരം കുക്കുമ്പറുകൾ ഒഴിവാക്കുന്നതാണ് നല്ലത്.

വളരെ വലുതായ കുക്കുമ്പറുകൾക്ക് കയ്പുണ്ടാകാനും വിത്തുകൾ കൂടുതലാകാനും സാധ്യതയുണ്ട്. മിതമായ വലിപ്പവും സമതല ആകൃതിയുമുള്ള കുക്കുമ്പറുകളാണ് പൊതുവേ മികച്ചത്.

കുക്കുമ്പർ അമർത്തുമ്പോൾ ഉറച്ചതായി തോന്നണം. വളരെ മൃദുവോ ചുളിവുകളുള്ളതോ ആണെങ്കിൽ അത് പഴകിയതായിരിക്കാം.

രണ്ട് അഗ്രങ്ങളും ആരോഗ്യകരമായിരിക്കണം. അഗ്രങ്ങൾ ഉണങ്ങിയതോ ചീഞ്ഞതോ ആണെങ്കിൽ വാങ്ങാതിരിക്കുന്നതാണ് നല്ലത്.

ഒരേ വലിപ്പത്തിലുള്ള രണ്ട് കുക്കുമ്പറുകളിൽ കൂടുതൽ ഭാരം തോന്നുന്നതാണ് സാധാരണയായി കൂടുതൽ ജലാംശമുള്ളതും ഫ്രഷായിട്ടുള്ളതും.

വാങ്ങിയ കുക്കുമ്പറിന് കയ്പ്പുണ്ടെന്ന് കരുതി അത് കളയുകയൊന്നും വേണ്ട. പുറംതൊലി കളഞ്ഞും അറ്റങ്ങൾ കുറച്ചധികം മുറിച്ചു മാറ്റിയും ഈ കയ്പ്പ് കളയാവുന്നതാണ്.

മുറിച്ച ഭാഗത്ത് അൽപ്പം ഉപ്പ് വിതറി ഉരസുന്നതും കയ്പ്പ് മാറ്റാൻ സഹായിക്കും.