മഴക്കാലത്ത് വീട്ടിൽ പൂപ്പലിന്റെ മണമുണ്ടോ? പരിഹാരം ഇതാ

മഴക്കാലത്ത് വീടിനുള്ളിൽ ഈർപ്പം ഉണ്ടാകുന്നത് സാധാരണമാണ്.

മഴക്കാലത്തെ ഈർപ്പം ചുമരുകളിലും ഫർണിച്ചറുകളിലും വസ്ത്രങ്ങളിലുമെല്ലാം പൂപ്പൽ വളരാൻ കാരണമാകുകയും വീടിനുള്ളിൽ അസ്വസ്ഥതയുണ്ടാക്കുന്ന ചീത്ത മണം പരക്കുകയും ചെയ്യുന്നു.

എന്നാൽ ചില ലളിതമായ മാർഗങ്ങൾ സ്വീകരിച്ചാൽ ഈ പ്രശ്നം എളുപ്പത്തിൽ പരിഹരിക്കാം.

മഴ മാറിയ സമയങ്ങളിൽ ജനലുകളും വാതിലുകളും തുറന്ന് വീടിനുള്ളിലേക്ക് ശുദ്ധവായു കടക്കാൻ അനുവദിക്കുക. ഇത് ഈർപ്പം കുറയ്ക്കാനും ദുർഗന്ധം ഒഴിവാക്കാനും സഹായിക്കും.

അടുക്കളയിലും ബാത്ത്റൂമിലും എക്സോസ്റ്റ് ഫാനുകൾ പ്രവർത്തിപ്പിക്കുന്നത് ഈർപ്പമുള്ള വായു പുറത്തേക്ക് നീക്കം ചെയ്യാൻ സഹായിക്കും. മുറികളിൽ ഫാനുകൾ പ്രവർത്തിപ്പിക്കുന്നതും ഗുണം ചെയ്യും.

ബേക്കിങ് സോഡ ദുർഗന്ധം ആഗിരണം ചെയ്യാനുള്ള മികച്ച ഒരു വസ്തുവാണ്. ചെറിയ പാത്രങ്ങളിൽ ബേക്കിങ് സോഡ നിറച്ച് മുറികളുടെ കോണുകളിലും അലമാരകളിലും വയ്ക്കാം.

ആക്ടിവേറ്റഡ് ചാർക്കോൾ ഈർപ്പവും ദുർഗന്ധവും ആഗിരണം ചെയ്യാൻ വളരെ ഫലപ്രദമാണ്. അലമാരകൾ, ഷൂ റാക്കുകൾ, സ്റ്റോർ റൂമുകൾ എന്നിവിടങ്ങളിൽ ഇത് വയ്ക്കാം.

നനവുള്ള വസ്ത്രങ്ങൾ അലമാരയിൽ സൂക്ഷിക്കുന്നത് പൂപ്പലിനും ദുർഗന്ധത്തിനും കാരണമാകും. വസ്ത്രങ്ങൾ നന്നായി ഉണങ്ങിയ ശേഷം മാത്രമേ മടക്കി വയ്ക്കാവൂ.

ചുമരുകളിലോ സീലിങ്ലോ പൂപ്പൽ കണ്ടാൽ ഉടൻ തന്നെ വിനാഗിരി കലർന്ന വെള്ളമോ അനുയോജ്യമായ ക്ലീനിങ് ലായനിയോ ഉപയോഗിച്ച് വൃത്തിയാക്കുക.

നാരങ്ങയുടെ തോലോ കറുവപ്പട്ടയോ ഗ്രാമ്പുവോ ചെറിയ പാത്രങ്ങളിൽ വച്ച് മുറികളിൽ സൂക്ഷിച്ചാൽ വീടിന് സ്വാഭാവികമായ സുഗന്ധം ലഭിക്കും.

മഴക്കാലത്ത് ബെഡ്ഷീറ്റുകൾ, തലയണകൾ, കാർപെറ്റുകൾ എന്നിവയിൽ ഈർപ്പം അടിഞ്ഞുകൂടാം. ഇവ ഇടയ്ക്കിടെ വെയിലത്ത് അല്ലെങ്കിൽ നല്ല വായുസഞ്ചാരമുള്ള സ്ഥലത്ത് ഉണക്കുക.

ഈർപ്പം കൂടുതലുള്ള വീടുകളിൽ ഡീഹ്യുമിഡിഫയർ ഉപയോഗിക്കുന്നത് മുറിയിലെ ഈർപ്പത്തിന്റെ അളവ് നിയന്ത്രിക്കാൻ സഹായിക്കും.