ഇന്ന് ലോക മത്തി ദിനം; ഇവയത്ര ചെറിയ മീനല്ല

മലയാളികൾക്ക് ഏറെ പരിചിതവും പ്രിയപ്പെട്ടതുമായ മത്സ്യമാണ് മത്തി അഥവാ ചാള.

മത്തിക്ക് പ്രത്യേകമായി ഒരു ദിവസം ഉണ്ടെന്ന കാര്യം നിങ്ങൾക്ക് അറിയാമോ? അതേ,നവംബർ 24 ​ആണ് ആ മത്തി ദിനം.

കാണാൻ ചെറിയ മീൻ ആണെങ്കിലും ആരോഗ്യ ഗുണങ്ങളിൽ കേമനാണ് നമ്മുടെ ഈ മത്തി.

ഒമേഗ-3 ഫാറ്റി ആസിഡുകളാൽ നിറഞ്ഞ എണ്ണമറ്റ ആരോഗ്യ ഗുണങ്ങൾ നൽകുന്ന ഒരു മത്സ്യമാണ് നമ്മുടെ നാട്ടിൽ സുലഭമായി ലഭിക്കുന്ന മത്തി.

ശരീരകോശങ്ങളുടെ വളര്‍ച്ചയ്ക്കും തേയ്മാനം പരിഹരിക്കുന്നതിനും അത്യാവശ്യമായ പ്രോട്ടീന്‍ മത്തിയില്‍ ധാരാളമായി അടങ്ങിയിട്ടുണ്ട്.

കാര്‍ബോഹൈഡ്രേറ്റിന്റെ സാന്നിധ്യം തീര്‍ത്തും കുറവായതുകൊണ്ട് ശരീരഭാരം നിയന്ത്രിക്കുന്നതിന് മാത്തി സഹായിക്കുകയും ചെയ്യുന്നു.

എല്ലിന്റെയും പല്ലിന്റെയും ഉറപ്പിന് ആവശ്യമായ കാല്‍സ്യവും ഫോസ്ഫറസും മത്തിയിൽ അടങ്ങിയിട്ടുണ്ട്. പതിവായി മത്തി കഴിക്കുന്നത് ഉറപ്പുള്ള എല്ലും പല്ലും നിലനിര്‍ത്താനും ഓസ്റ്റിയോ പൊറോസിസ് തടയാനും സഹായിക്കുന്നു.

വിറ്റാമിൻ ബി 12 ന്റെ മികച്ച ഉറവിടം കൂടിയാണ് മത്തി. വിറ്റാമിൻ ബി 12 രക്തത്തെയും നാഡീവ്യവസ്ഥയെയും എല്ലായിപ്പോഴും ആരോഗ്യകരമായി നിലനിർത്താൻ സഹായിക്കുന്നു.