പഴകിയ വസ്ത്രങ്ങൾ പോലും പുത്തനാകും

വസ്ത്രങ്ങൾ എപ്പോഴും പുത്തനായിരിക്കാൻ ഇഷ്ടപ്പെടുന്നവരാണ് നമ്മൾ എല്ലാവരും.

ഉപയോഗം കൂടുന്നതിന് അനുസരിച്ച് വസ്ത്രങ്ങളിലെ നിറത്തിനും മങ്ങൽ സംഭവിക്കും.

പലരും ബ്ലീച്ച് ഉപയോഗിച്ചാണ് മങ്ങിപ്പോയ വസ്ത്രങ്ങൾ വെളുപ്പിക്കുന്നത്. ഇത് പുത്തനാക്കുമെങ്കിലും വസ്ത്രങ്ങൾക്ക് അത്ര നല്ലതല്ല.

വസ്ത്രങ്ങൾക്ക് കേടു സംഭവിക്കാതെ പഴകിയ വസ്ത്രങ്ങളെ പുത്തനാക്കാൻ പറ്റുന്ന ചില ട്രിക്കുകൾ നോക്കാം.

ചൂട് വെള്ളത്തിൽ കുറച്ച് വിനാഗിരി ഒഴിച്ച് കൊടുത്തതിന് ശേഷം രാത്രി മുഴുവൻ വസ്ത്രം വിനാഗിരി ലായനിയിൽ മുക്കിവയ്ക്കണം. പിറ്റേ ദിവസം ആകുമ്പോൾ വിനാഗിരിയിൽ മുക്കിവെച്ചിരിക്കുന്ന വസ്ത്രം നന്നായി കഴുകിയെടുക്കാം. ഇത് വസ്ത്രത്തിലെ മങ്ങൽ നീക്കും.

അര കപ്പ് നാരങ്ങ നീര് എടുത്തതിന് ശേഷം അതിലേക്ക് കുറച്ച് ചൂട് വെള്ളം ഒഴിച്ച് കൊടുക്കാം. ഒരുമണിക്കൂറോളം ഈ വെള്ളത്തിൽ വസ്ത്രങ്ങൾ മുക്കി വെച്ചതിന് ശേഷം നന്നായി കഴുകിയെടുത്താൽ വസ്ത്രങ്ങൾ പുത്തൻ പോലെയാകും.

ചൂട് വെള്ളത്തിൽ കുറച്ച് ബേക്കിംഗ് സോഡ ഇട്ടുകൊടുത്തതിന് ശേഷം വസ്ത്രങ്ങൾ വെള്ളത്തിൽ മുക്കിവയ്ക്കാം. ഒരു മണിക്കൂർ അങ്ങനെ തന്നെ വെച്ചതിന് ശേഷം നന്നായി കഴുകിയെടുത്താൽ വസ്ത്രങ്ങൾ പുതുപുത്തനാകും.

ചൂട് വെള്ളത്തിൽ 3 ടേബിൾ സ്പൂൺ സിട്രിക് ആസിഡ് ചേർത്തതിന് ശേഷം കുറഞ്ഞത് 4 മണിക്കൂർ എങ്കിലും വസ്ത്രങ്ങൾ വെള്ളത്തിൽ മുക്കിവയ്ക്കാൻ ശ്രദ്ധിക്കണം. ശേഷം എപ്പോഴും കഴുകുന്നത് പോലെ വസ്ത്രങ്ങൾ കഴുകിയെടുക്കാം.