ഇങ്ങനെ ഒന്ന് ട്രൈ ചെയ്യൂ, അച്ചാറില്‍ പൂപ്പല്‍ വരില്ല

എല്ലാ വീടുകളിലും അച്ചാര്‍ ഉണ്ടാവും. അച്ചാറില്ലാത്ത വീടില്ലെന്നു തന്നെ പറയുന്നതാവും ശരി. അത്രയ്ക്കും അച്ചാര്‍ പ്രിയരാണ് മലയാളികള്‍.

മാങ്ങയും തേങ്ങയും നാരങ്ങയുമുള്‍പ്പെടെ ബീഫും മീനും പോര്‍ക്കും ആടുമൊക്കെ അച്ചാറായി വീടുകളിലിരിപ്പുണ്ട്. എന്നാല്‍ അച്ചാര്‍ ഇത്രയേറെ സജീവമാണെങ്കിലും ഇത് പെട്ടെന്ന് പൂത്ത് പോവുന്നത് കാണാം.

അച്ചാറിൽ പൂപ്പൽ വരാതിരിക്കാനുള്ള ചില പരിഹാരങ്ങൾ പറഞ്ഞ് തരാം.

എന്ത് ഉപയോഗിച്ചാണോ അച്ചാര്‍ ഇടുന്നത്, അവ കഴുകി നന്നായി തുടച്ച് വെള്ളം പോയെന്ന് ഉറപ്പ് വരുത്തിയതിന് ശേഷം മാത്രം ഉപയോ​ഗിക്കുക.

നല്ലെണ്ണ ധാരാളം ഉപയോഗിച്ച് അച്ചാര്‍ ഉണ്ടാക്കുക.

അച്ചാര്‍ ഭരണിയില്‍ അച്ചാറിന് മുകളില്‍ എണ്ണ തെളിഞ്ഞ് നില്‍ക്കുന്നത് പൂപ്പല്‍ ഒഴിവാക്കും.

അച്ചാറുകള്‍ ഗ്ലാസ് ഭരണിയില്‍ തന്നെ സൂക്ഷിച്ച് വയ്ക്കുക. പ്ലാസ്റ്റിക്ക് ഭരണി ഉപയോഗിക്കാതിരിക്കുക.

ഭരണി കഴുകി വെയിലത്ത് വച്ച് ഉണക്കിയ ശേഷം അച്ചാറുകള്‍ ഭരണിയിലേക്ക് മാറ്റുക.

അച്ചാറില്‍ പച്ചകറിവേപ്പില ഇടാതിരിക്കുക. കറിവേപ്പില വറുത്ത ശേഷമോ വെയിലത്ത് ഉണക്കിയ ശേഷമോ അച്ചാറില്‍ ഇടാം.

അച്ചാര്‍ എടുക്കാന്‍ ഉണങ്ങിയ സ്പൂണ്‍ ഉപയോഗിക്കുക.

അച്ചാര്‍ ഭരണി ഇടയ്ക്കിടെ എടുത്ത് തുറക്കുന്നത് ഒഴിവാക്കുന്നത് പൂപ്പലിനെ അകറ്റിനിര്‍ത്തും. രണ്ടോ മൂന്നൊ ദിവസത്തിനുള്ള അച്ചാര്‍ ചെറിയൊരു പാത്രത്തിലേക്ക് മാറ്റി അത് ഉപയോഗിക്കാം.