"മറ്റൊരാളുടെ ജീവിതത്തിലെ കാർമേഘത്തിനിടയിൽ ഒരു മഴവില്ലാവുക": മായ ആഞ്ചലോ

മറ്റൊരാളുടെ ജീവിതത്തിലെ കാർമേഘത്തിനിടയിൽ ഒരു മഴവില്ലാകാൻ ശ്രമിക്കുക എന്നാണ് മായ ആഞ്ചലോ പറയുന്നത്. മനുഷ്യന്റെ ദുഃഖം, വിഷമം, ഏകാന്തത, നിരാശ തുടങ്ങിയ ജീവിതത്തിലെ പ്രയാസങ്ങളെയാണ് കാർമേഘങ്ങൾകൊണ്ട് ഉദ്ദേശിക്കുന്നത്. മഴവില്ല് പ്രതീക്ഷ, ആശ്വാസം, സന്തോഷം, സ്നേഹം എന്നിവയുടെ പ്രതീകവുമാണ്.

നമുക്ക് ഒരാളുടെ പ്രശ്നങ്ങൾ മുഴുവൻ പരിഹരിക്കാൻ കഴിയണമെന്നില്ല. പക്ഷേ അവരുടെ വിഷമസമയത്ത് ഒരു നല്ല വാക്ക് പറയാനും, ഒപ്പം നിൽക്കാനും, ശ്രദ്ധയോടെ കേൾക്കാനും നമുക്ക് കഴിയും. ചിലപ്പോൾ അതുതന്നെ ഒരാളുടെ ദിവസത്തെ മാറ്റിമറിച്ചേക്കാം.

മറ്റൊരാളുടെ ജീവിതത്തിലെ ഇരുട്ട് നമുക്ക് പൂർണ്ണമായി മാറ്റാൻ കഴിയില്ലെങ്കിലും, അതിനിടയിൽ ഒരു ചെറിയ പ്രതീക്ഷയും ആശ്വാസവും സന്തോഷവും നൽകാൻ നമുക്ക് കഴിയും.

ഓഫീസിൽ ഒരു സഹപ്രവർത്തകൻ വ്യക്തിപരമായ പ്രശ്നം കാരണം വിഷമിച്ചിരിക്കുകയാണെന്ന് കരുതുക. എല്ലാവരും അത് അവഗണിക്കുമ്പോൾ, “നിനക്ക് സംസാരിക്കണമെങ്കിൽ ഞാൻ കേൾക്കാം” എന്ന് പറയുന്നത് പോലും വലിയൊരു ആശ്വാസമായേക്കാം. അവിടെ അയാളുടെ കാർമേഘങ്ങളിലെ മഴവില്ലാകും നിങ്ങൾ

ലോകസാഹിത്യത്തിലെ സുപ്രധാന എഴുത്തുകാരിയായിരുന്നു മായ ആഞ്ചലോ. കവയിത്രി, എഴുത്തുകാരി, അധ്യാപിക, സാമൂഹിക പ്രവർത്തക, സിവിൽ റൈറ്റ്സ് പ്രവർത്തക എന്നിങ്ങനെയും അറിയപ്പെട്ടു.

'ഐ നോ വൈ കേജ്ഡ് ബേർഡ് സിങ്സ്' (I Know Why the Caged Bird Sings) എന്ന ആത്മകഥയിലൂടെയാണ് അവർ ലോകപ്രശസ്തയായത്. ജീവിതത്തിലെ വേദനകളും വിവേചനങ്ങളും അതിജീവിച്ച് ശക്തിയുടെയും ആത്മാഭിമാനത്തിന്റെയും ശബ്ദമായി മാറിയ വ്യക്തിയായിരുന്നു അവർ.

മായ ആഞ്ചലോ 2008-ൽ പ്രസിദ്ധീകരിച്ച പുസ്തകമായ 'ലെറ്റർ ‌ടു മൈ ഡോട്ടറിലെ' (Letter to My Daughter) വാക്കുകളാണിത്. ലോകമെമ്പാടുമുള്ള സ്ത്രീകളെ തന്റെ ‘മക്കളായി’ കണ്ട് പങ്കുവെക്കുന്ന ജീവിതപാഠങ്ങളാണ് പുസ്തകം

സ്വന്തം അനുഭവങ്ങളിൽ നിന്നുള്ള പാഠങ്ങൾ മറ്റുള്ളവർക്ക് കൈമാറുന്ന ഒരു മുതിർന്ന വ്യക്തിയുടെ സ്നേഹപൂർവമായ ഉപദേശത്തിന്റെ സ്വഭാവമാണ് പുസ്തകത്തിനുള്ളത്

മഴയ്ക്ക് ശേഷം പ്രത്യക്ഷപ്പെടുന്ന മഴവില്ല് പോലെ, ജീവിതത്തിലെ ഇരുണ്ട സമയങ്ങൾക്ക് ശേഷവും പ്രതീക്ഷ ഉണ്ടാകും എന്ന ആശയമാണ് ഈ വാക്കിലൂടെ മുന്നോട്ടു വെയ്ക്കുന്നത്. മറ്റൊരാളുടെ ജീവിതത്തിൽ ആ പ്രതീക്ഷയുടെ കാരണമാകാൻ കഴിയുക എന്നത് മഹത്തരമാണ്.