വിനോദ് കാംബ്ലിയും അപൂര്‍വത കൈയൊപ്പ് ചാര്‍ത്തിയ ടെസ്റ്റ് ബാറ്റിങും!

സച്ചിന്‍ ടെണ്ടുല്‍ക്കര്‍ക്കൊപ്പം സ്‌കൂള്‍ ക്രിക്കറ്റില്‍ റെക്കോര്‍ഡ് കൂട്ടുകെട്ടുയര്‍ത്തിയ താരം.

സച്ചിനേക്കാള്‍ മികച്ചവനെന്നു പരിശീലകന്‍ രമാകാന്ത് അച്ചരേക്കര്‍ വിലയിരുത്തിയ പ്രതിഭാ ധാരാളിത്തം.

വിനോദ് ഗണപത് കാംബ്ലിയുടെ ടെസ്റ്റ് ബാറ്റിങ് ഒരു അപൂര്‍വതയാണ്. 21ാം വയസിൽ തുടങ്ങി 23ാം വയസിൽ അവസാനിച്ച ടെസ്റ്റ് കരിയർ.

വെറും 17 ടെസ്റ്റുകള്‍ മാത്രം കളിച്ച കാംബ്ലി ആദ്യ 6 ടെസ്റ്റില്‍ നിന്നു 2 ഇരട്ട സെഞ്ച്വറിയുള്‍പ്പെടെ 4 സെഞ്ച്വറികളാണ് അടിച്ചത്.

ഇന്ത്യക്കായി ടെസ്റ്റില്‍ ഇരട്ട സെഞ്ച്വറി നേടിയ ഏറ്റവും പ്രായം കുറഞ്ഞ താരമാണ് കാംബ്ലി. 21 വയസും 32 ദിവസവും പ്രായമുള്ളപ്പോഴാണ് നേട്ടം.

21 വയസിനിടെ 6 ടെസ്റ്റില്‍ നിന്നു 2 ഇരട്ട സെഞ്ച്വറിയുള്‍പ്പെടെ 4 സെഞ്ച്വറികള്‍ നേടിയ ഏക ഇന്ത്യന്‍ താരവും കാംബ്ലിയാണ്. ടെസ്റ്റിൽ ഏറ്റവും കൂടുതൽ ബാറ്റിങ് ആവറേജുള്ള (54.20) ഇന്ത്യൻ താരമെന്ന നേട്ടം ഇന്നും കാംബ്ലിയുടെ പേരിലാണ്.

ടെസ്റ്റ് ക്രിക്കറ്റ് ചരിത്രത്തില്‍ ആദ്യ നാല് ടെസ്റ്റ് മത്സരങ്ങളില്‍ തുടര്‍ച്ചയായി രണ്ട് ഡബിള്‍ സെഞ്ച്വറികള്‍ നേടിയ ലോകത്തിലെ ഏക താരമാണ് കാംബ്ലി. ഇംഗ്ലണ്ടിനെതിരെ 224 റണ്‍സും സിംബാബ്‌വെക്കെതിരെ 227 റണ്‍സും.

പിന്നാലെ ശ്രീലങ്കക്കെതിരെ തുടരെ രണ്ട് സെഞ്ച്വറികളും കാംബ്ലി അടിച്ചു. 125, 120 റണ്‍സ് നേട്ടങ്ങള്‍.

3 വ്യത്യസ്ത രാജ്യങ്ങള്‍ക്കെതിരെ 3 ഇന്നിങ്സുകളില്‍ തുടര്‍ച്ചയായി 3 ടെസ്റ്റ് സെഞ്ച്വറികള്‍ നേടിയ ഏക ക്രിക്കറ്റ് താരവും കാംബ്ലിയാണ്.

ടെസ്റ്റില്‍ വെറും 14 ഇന്നിങ്‌സില്‍ നിന്നു 1000 റണ്‍സ് തികച്ച് അതിവേഗത്തില്‍ ഈ നേട്ടത്തിലെത്തിയ ഇന്ത്യന്‍ താരമെന്ന റെക്കോര്‍ഡും കാംബ്ലിയുടെ പേരില്‍ തന്നെ.