ചെറിയ മുറി വലുതായി തോന്നണോ? ഈ കാര്യങ്ങൾ ഒന്ന് മാറ്റിനോക്കൂ!

വീട്ടിലെ മുറി ചെറുതാണെന്നത് പലപ്പോഴും വലിയ പ്രശ്നമായി തോന്നാം. ആവശ്യത്തിന് ഫർണിച്ചർ വയ്ക്കുമ്പോഴേക്കും മുറി നിറഞ്ഞതുപോലെയും നടക്കാൻ പോലും ഇടമില്ലാത്തതുപോലെയും തോന്നും. എന്നാൽ മുറിയുടെ വലുപ്പം കൂട്ടാതെ തന്നെ കണ്ണിന് കൂടുതൽ വിശാലമായി തോന്നുന്ന രീതിയിൽ ഇടം ക്രമീകരിക്കാൻ ചില മാർഗങ്ങളുണ്ട്.

ഫർണിച്ചറിന്റെ വലുപ്പം, വെളിച്ചം, നിറം, കണ്ണാടിയുടെ സ്ഥാനം, മുറിയിലെ സാധനങ്ങളുടെ എണ്ണം തുടങ്ങിയ കാര്യങ്ങളിൽ ശ്രദ്ധിച്ചാൽ ചെറിയ മുറിക്ക് പോലും കൂടുതൽ തുറന്നതും വായുസഞ്ചാരമുള്ളതുമായ രൂപം നൽകാം.

ചെറിയ മുറിയിൽ ഏറ്റവും വലിയ തെറ്റ് മുറിയുടെ വലുപ്പത്തിന് ആനുപാതികമല്ലാത്ത ഫർണിച്ചറുകൾ തിരഞ്ഞെടുക്കുന്നതാണ്. ഭിത്തിയോട് ചേർന്ന് കുത്തിനിറഞ്ഞുനിൽക്കുന്ന വലിയ സോഫയും അലമാരയും മുറിയെ കൂടുതൽ ഇടുങ്ങിയതായി തോന്നിക്കും.

തറയോട് ചേർന്ന് നിൽക്കുന്ന ലോ പ്രൊഫൈൽ ഫർണിച്ചർ മുറിയുടെ മുകൾഭാഗത്ത് കൂടുതൽ ഒഴിഞ്ഞ സ്ഥലം അവശേഷിപ്പിക്കും. ഇതോടെ സീലിങ് ഉയരമുള്ളതായും മുറി കൂടുതൽ തുറന്നതായും തോന്നും.

തറ പൂർണമായി മറയ്ക്കുന്ന ഭാരമുള്ള ഫർണിച്ചറുകൾക്ക് പകരം നീളമുള്ള കാലുകളുള്ള, സ്ലിം ഡിസൈനിലുള്ള കസേരകളും സോഫകളും തിരഞ്ഞെടുക്കാം. ഫർണിച്ചറുകൾക്ക് താഴെയും ചുറ്റുമായി വെളിച്ചവും കാഴ്ചയും കടന്നുപോകുന്നതിനാൽ ഫർണിച്ചർ തന്നെ ഫ്ലോട്ടിങ്ങായി തോന്നും.

ജനലിന് എതിർവശത്ത് കണ്ണാടി സ്ഥാപിച്ചാൽ പുറത്തുനിന്നുള്ള വെളിച്ചവും കാഴ്ചയും പ്രതിഫലിപ്പിക്കാനാകും. ഇതിലൂടെ മുറിയിൽ കൂടുതൽ വെളിച്ചവും ആഴവും ഉള്ളതായി തോന്നും.

വലിയ കർട്ടനുകളും കട്ടിയുള്ള റഗുകളും മുറിയിൽ അധിക വിഷ്വൽ വെയിറ്റ് സൃഷ്ടിക്കാം. ജനലിലൂടെ പുറത്തേക്കുള്ള കാഴ്ച തടയാതെ സൂക്ഷിക്കുന്നത് മുറിക്ക് കൂടുതൽ തുറന്ന അനുഭവം നൽകും. സ്വകാര്യത ആവശ്യമുണ്ടെങ്കിൽ ഭാരം കുറഞ്ഞ ബ്ലൈൻഡുകൾ, ഷട്ടറുകൾ, മെഷ് കർട്ടനുകൾ തുടങ്ങിയവ പരിഗണിക്കാം.

ചെറിയ മുറികളിൽ വെള്ളയും ഇളം നിറങ്ങളും ഉപയോഗിക്കുന്നത് വെളിച്ചം പ്രതിഫലിപ്പിക്കുകയും മുറിയെ കൂടുതൽ ബ്രൈറ്റായും വായുസഞ്ചാരമുള്ളതായി തോന്നിക്കുകയും ചെയ്യും. ഭിത്തിക്കും സീലിങ്ങിനും ഒരേ നിറം നൽകുന്നത് ഇരുവർക്കുമിടയിലെ അതിരുകൾ കുറച്ച് സീലിങ് കൂടുതൽ ഉയരമുള്ളതായി തോന്നാൻ സഹായിക്കും.

കട്ടിയുള്ളതും വെളിച്ചം ആഗിരണം ചെയ്യുന്നതുമായ ഫാബ്രിക്സ് മുറിയെ ഭാരമുള്ളതായി തോന്നിക്കാം. അതിനുപകരം ലിനൻ പോലുള്ള ലൈറ്റ് വെയിറ്റ് ഫാബ്രിക്സ് ഉപയോഗിക്കുന്നത് മുറിക്ക് കൂടുതൽ എയറി ഫീൽ നൽകും. കർട്ടൻ, കുഷ്യൻ കവർ, ത്രോ തുടങ്ങിയവ തിരഞ്ഞെടുക്കുമ്പോഴും ഇളം തുണികൾ പരിഗണിക്കാം.

ചെറിയ മുറിയിൽ കൂടുതൽ ഫർണിച്ചർ, അലങ്കാര വസ്തുക്കൾ, പലതരം പാറ്റേൺസ്, നിറങ്ങൾ എന്നിവ ഒരുമിച്ച് ഉപയോഗിച്ചാൽ മുറി ക്ലറ്റേർഡായി തോന്നും.

നിരവധി ചെറിയ അലങ്കാര വസ്തുക്കൾക്ക് പകരം ഒന്നോ രണ്ടോ പ്രധാനപ്പെട്ട പീസസ് മാത്രം ഉപയോഗിക്കാം. പല നിറങ്ങൾ ചേർക്കുന്നതിന് പകരം ഒരു പ്രധാന നിറവും അതിനോട് ചേർന്ന കുറച്ച് ഷേഡ്സും തിരഞ്ഞെടുക്കുന്നത് മുറിക്ക് കൂടുതൽ ഏകീകൃതമായ രൂപം നൽകും.