വസ്ത്രങ്ങൾ കൂടുന്നു, ഉപയോഗം കുറയുന്നു; ജെൻ സിയുടെ ഫാഷൻ ഭ്രമം, മാതാപിതാക്കൾ അറിയേണ്ടത്

അലമാര തുറക്കുമ്പോൾ വസ്ത്രങ്ങൾ നിറഞ്ഞിരിക്കുന്നു. എന്നിട്ടും പുറത്തേക്ക് പോകാനൊരുങ്ങുമ്പോൾ സ്ഥിരം പരാതി- ‘ധരിക്കാൻ ഒന്നുമില്ല!’ പലർക്കും പരിചിതമായ ഈ അവസ്ഥയ്ക്ക് പിന്നിൽ വസ്ത്രങ്ങളുടെ കുറവല്ല, മറിച്ച് വസ്ത്രങ്ങൾ തിരഞ്ഞെടുക്കുന്ന രീതിയിലുള്ള മാറ്റങ്ങളാണെന്നാണ് ഫാഷൻ ലോകത്തെ പുതിയ ചർച്ചകൾ സൂചിപ്പിക്കുന്നത്.

ജെൻ സിക്കിടയിൽ ട്രെൻഡുകൾ അതിവേഗം മാറുന്നതും സോഷ്യൽ മീഡിയയുടെ സ്വാധീനവും ഇതിന് കാരണമാണ്. ഒരുപാട് വസ്ത്രങ്ങൾ സ്വന്തമായുണ്ടെങ്കിലും അവ തമ്മിൽ എങ്ങനെ കൂട്ടിച്ചേർത്ത് പുതിയ ലുക്ക് ഉണ്ടാക്കണമെന്ന ആശയക്കുഴപ്പം പലരിലും ഉണ്ടാകാം.

അലമാര നിറയെ വസ്ത്രങ്ങളുണ്ടെന്നത് മാത്രം വൈവിധ്യമാർന്ന ഔട്ട്ഫിറ്റുകൾ ഉണ്ടെന്നതിന് തെളിവല്ല. ഒരേ തരത്തിലുള്ള ടോപ്പുകൾ, വ്യത്യസ്ത നിറങ്ങളിലുള്ള ജീൻസ്, ട്രെൻഡിനെ പിന്തുടർന്ന് വാങ്ങിയ വസ്ത്രങ്ങൾ എന്നിവ കൂടുതലായിരിക്കാം.

എന്നാൽ ഇവ പരസ്പരം എളുപ്പത്തിൽ മിക്സ് ചെയ്ത് ധരിക്കാൻ കഴിയാത്തവയാണെങ്കിൽ, ഓരോ ദിവസവും പുതിയ വസ്ത്രം വേണമെന്ന തോന്നലുണ്ടാകും.

ഇൻസ്റ്റ​ഗ്രാം, ടിക് ടോക്ക്, പിൻ‌ട്രസ്റ്റ് തുടങ്ങിയ പ്ലാറ്റ്ഫോമുകളിൽ ഓരോ ദിവസവും പുതിയ ഫാഷൻ ട്രെൻഡുകളാണ് എത്തുന്നത്. ക്ലീൻ ​ഗേൾ, ഓൾഡ് മണി, മോബ് വൈഫ്, ഓഫീസ് സൈറൺ തുടങ്ങി വ്യത്യസ്ത എസ്തറ്റിക്കുകൾ ജനപ്രിയമാകുമ്പോൾ, ഓരോ ട്രെൻഡിനും അനുയോജ്യമായ വസ്ത്രങ്ങൾ സ്വന്തമാക്കാനുള്ള താൽപര്യവും വർധിക്കുന്നു.

ഒരു ട്രെൻഡ് മാറുമ്പോൾ നേരത്തെ വാങ്ങിയ വസ്ത്രങ്ങൾ പഴയതായി തോന്നാനും സാധ്യതയുണ്ട്. ഇതോടെ വസ്ത്രങ്ങൾ കൂടിക്കൊണ്ടിരിക്കുമ്പോഴും ധരിക്കാൻ അനുയോജ്യമായ വസ്ത്രങ്ങളില്ലെന്ന തോന്നൽ ഉണ്ടാകാം.

ഫാഷൻ ട്രെൻഡുകൾ ഇനി വർഷങ്ങളോളം നീളണമെന്നില്ല. ഏതാനും ആഴ്ചകളോ മാസങ്ങളോ കൊണ്ട് തന്നെ പുതിയ സ്റ്റൈലുകൾ ജനപ്രിയമാകുന്നുണ്ട്. ഇതിനെ മൈക്രോ ട്രെന്റ്സ് എന്നാണ് പൊതുവെ വിളിക്കുന്നത്. ഒരു പ്രത്യേക നിറമോ പാറ്റേണോ സിലൂയറ്റോ വൈറലാകുമ്പോൾ അത് സ്വന്തമാക്കാനുള്ള ആവേശത്തിൽ വാങ്ങുന്ന വസ്ത്രങ്ങൾ പിന്നീട് അധികം ഉപയോഗിക്കാതെ അലമാരയിൽ തന്നെ കിടക്കാം.

ജെൻ Z-ന്റെ ഫാഷൻ ശീലങ്ങളിലെ ശ്രദ്ധേയമായ മറ്റൊരു മാറ്റം, വസ്ത്രങ്ങളുടെ പ്രത്യേക ഭാഗങ്ങൾക്കോ ​​ഇനങ്ങൾക്കോ ​​പകരം പൂർണ്ണമായ വസ്ത്രധാരണരീതിക്ക് (complete outfits) നൽകുന്ന പ്രാധാന്യമാണ്. ഒരു മനോഹരമായ ടോപ്പ് മാത്രം വാങ്ങിയാൽ അത് എങ്ങനെ ധരിക്കുമെന്ന് ചിന്തിക്കാതെ പോയാൽ പിന്നീട് അതിനൊപ്പം ചേരുന്ന പാന്റോ സ്കർട്ടോ ഷൂസോ ആക്സസറികളോ തേടേണ്ടി വരും.

വസ്ത്രങ്ങളുടെ എണ്ണം കുറയ്ക്കാതെ തന്നെ ‘ധരിക്കാൻ ഒന്നുമില്ല’ എന്ന പ്രശ്നം കുറയ്ക്കാൻ സഹായിക്കുന്ന ആശയമാണ് കാപ്സ്യൂൾ വാഡ്രോബ്. ഒന്നിനൊന്ന് എളുപ്പത്തിൽ മിക്സ് ചെയ്ത് ധരിക്കാവുന്ന അടിസ്ഥാന വസ്ത്രങ്ങൾ തിരഞ്ഞെടുക്കുകയാണ് ഇതിന്റെ പ്രധാന ആശയം.

ഉദാഹരണത്തിന് ഒരു നല്ല ജീൻസ്, കറുപ്പ് അല്ലെങ്കിൽ വെള്ള നിറത്തിലുള്ള അടിസ്ഥാന ടോപ്പുകൾ, ഷർട്ട്, ട്രൗസർ, ലെയറിങ് പീസ് എന്നിവ പല രീതിയിൽ കൂട്ടിച്ചേർത്ത് വ്യത്യസ്ത ലുക്കുകൾ സൃഷ്ടിക്കാം.

സോഷ്യൽ മീഡിയയിലെ നിരന്തരം മാറുന്ന ഫാഷൻ ചിത്രങ്ങൾ കാണുമ്പോൾ ഒരേ വസ്ത്രം വീണ്ടും ധരിക്കുന്നത് പലർക്കും മടിയാകാം. എന്നാൽ യഥാർഥത്തിൽ ഒരു വസ്ത്രം പലതവണ പല രീതിയിൽ ധരിക്കുന്നത് കൂടുതൽ പ്രായോഗികമാണ്.

ഷർട്ട് ജീൻസിനൊപ്പം ഒരു ദിവസം, ട്രൗസറിനൊപ്പം മറ്റൊരു ദിവസം, സ്കർട്ടിനൊപ്പം മറ്റൊരു ദിവസം എന്നിങ്ങനെ സ്റ്റൈൽ ചെയ്യാം. ആക്സസറികളും ഷൂസും മാറ്റിയാലും ലുക്ക് വ്യത്യസ്തമാകും.