എന്താണ് യൂണിറ്റ് ലിങ്ക്ഡ് ഇന്‍ഷുറന്‍സ് പ്ലാന്‍ (യുലിപ്) ?

നിക്ഷേപ ഓപ്ഷന്‍ എന്നതിലുപരി ലൈഫ് ഇന്‍ഷുറന്‍സ് പരിരക്ഷയും ലഭിക്കുന്ന സാമ്പത്തിക ഉല്‍പ്പന്നമാണ് യുലിപ്.

പ്രീമിയത്തിന്റെ ഒരു ഭാഗം ലൈഫ് ഇന്‍ഷുറന്‍സ് പരിരക്ഷ നല്‍കുന്നതിനായി നീക്കി വെയ്ക്കുന്നു. ശേഷിക്കുന്നത് ഓഹരി വിപണിയിലും കടപ്പത്രത്തിലും ഹൈബ്രിഡ് ഫണ്ടുകളിലും നിക്ഷേപിക്കുന്നു.

യുലിപ് നിക്ഷേപം ഓഹരി വിപണിയില്‍ വേണോ കടപ്പത്രത്തില്‍ വേണോ അതോ ഹെബ്രിഡ് ഫണ്ടില്‍ നിക്ഷേപിച്ചാല്‍ മതിയോ എന്ന കാര്യം നിക്ഷേപകന് തീരുമാനിക്കാനുള്ള ഓപ്ഷനോട് കൂടിയ പ്ലാനാണിത്

പരമ്പരാഗത ഇന്‍ഷുറന്‍സ് പ്ലാനുകളെ അപേക്ഷിച്ച് യുലിപ് നിക്ഷേപത്തില്‍ റിട്ടേണിന് ഗ്യാരണ്ടി നല്‍കുന്നില്ല. വിപണിയിലെ മാറ്റങ്ങള്‍ക്ക് വിധേയമായിരിക്കും റിട്ടേണ്‍.

ഇത് പൂര്‍ണമായി ഒരു നിക്ഷേപ പദ്ധതിയല്ല. ഇന്‍ഷുറന്‍സ് പരിരക്ഷ ഇല്ലാത്തവര്‍ക്ക് നിക്ഷേപത്തിന്റെയും ഇന്‍ഷുറന്‍സ് പരിരക്ഷയുടെയും ഗുണം ഒരേ പോലെ ലഭിക്കുന്ന പ്ലാനാണിത്

യൂണിറ്റ്-ലിങ്ക്ഡ് ഇന്‍ഷുറന്‍സ് പ്ലാനുകളെ (യുലിപ്) നിക്ഷേപ പദ്ധതികളായി ഉപയോക്താക്കള്‍ക്ക് മുന്നില്‍ പ്രചരിപ്പിക്കരുതെന്ന് ഇന്‍ഷുറന്‍സ് കമ്പനികള്‍ക്ക് ഇന്‍ഷുറന്‍സ് റെഗുലേറ്ററി ആന്‍ഡ് ഡെവലപ്‌മെന്റ് അതോറിറ്റി നിര്‍ദേശം നല്‍കിയിട്ടുണ്ട്.

യുലിപ്പുകളെ നിയന്ത്രിക്കുന്നത് ഐആര്‍ഡിഎഐ ആണ്. ഉപയോക്താക്കളുടെ സംരക്ഷണം ഉറപ്പാക്കുന്നതിന് ഐആര്‍ഡിഎ സമഗ്രമായ മാര്‍ഗനിര്‍ദേശം പുറത്തിറക്കിയിട്ടുണ്ട്.