ചുമയും ജലദോഷവും ഉള്ളവര്‍ കരിപ്പെട്ടി ചായ കുടിക്കുന്നത് കൊണ്ട് ഗുണമുണ്ടോ?

ചുമയുടെയോ ജലദോഷത്തിന്‍റെയോ എല്ലാം പ്രയാസങ്ങള്‍ മാറാൻ വേണ്ടി മിക്കവരും നിര്‍ദേശിക്കുന്നതാണ് ചുക്കുകാപ്പി. ഇതില്‍ ചേര്‍ക്കുന്ന ഒന്നാണ് കരിപ്പെട്ടി , അല്ലെങ്കില്‍ ചക്കര.

എന്തുകൊണ്ടാണ് കരിപ്പെട്ടി ചുമ പോലുള്ള പ്രശ്നങ്ങള്‍ക്ക് നല്ലതാണെന്ന് പറയുന്നതെന്ന് നിങ്ങൾ ചിന്തിച്ചിട്ടുണ്ടോ?

വാസ്തവത്തില്‍ കരിപ്പെട്ടി നേരിട്ട് ചുമയെയോ ജലദോഷത്തെയോ ഇല്ലാതാക്കുന്നില്ല. മറിച്ച് ഇതിനുള്ള പലവിധത്തിലുള്ള ആരോഗ്യഗുണങ്ങളും ഒത്തുചേരുമ്പോള്‍ അത് ചുമ, കഫക്കെട്ട്, ജലദോഷം എന്നിങ്ങനെയുള്ള അണുബാധകള്‍ക്ക് ആശ്വാസമാവുകയാണ്.

ശരീരത്തിന് ചൂട് പകരാനും രോഗപ്രതിരോധ ശേഷിയെ മെച്ചപ്പെടുത്താനുമെല്ലാം ഇത് സഹായിക്കും.

അയേണ്‍, മഗ്നീഷ്യം, പൊട്ടാസ്യം, ഫോസ്ഫറസ് തുടങ്ങി പല ധാതുക്കളുടെയും മികച്ച കലവറയാണ് കരിപ്പെട്ടി . ഇവയെല്ലാം ആരോഗ്യത്തിന് ഏറെ നല്ലതാണ്.

ഇത് പതിവായി ഉപയോഗിക്കുമ്പോഴാണ് രോഗ പ്രതിരോധശേഷിയും മറ്റും മെച്ചപ്പെടുന്നത്.

ദഹനപ്രശ്നങ്ങള്‍ പരിഹരിക്കാൻ ശേഷിയുമുള്ളതിനാല്‍ ഏതെങ്കിലും അസുഖം ബാധിക്കപ്പെട്ടിരിക്കുമ്പോള്‍ അനുബന്ധമായി ദഹനക്കുറവ് നേരിടുന്ന സാഹചര്യത്തിലും കരിപ്പെട്ടി വളരെയധികം സഹായകമാകുന്നു.

ചുമ, കഫക്കെട്ട് എല്ലാം പിടിപെടുമ്പോള്‍ വയറ്റിനകത്തും കഫം കുടുങ്ങി അത് മലബന്ധത്തിലേക്ക് നയിക്കാറുണ്ട്. ഈ പ്രശ്നം പരിഹരിക്കുന്നതിനും കരിപ്പെട്ടി സഹായിക്കുന്നു.

വണ്ണം കുറയ്ക്കാൻ ശ്രമിക്കുന്നവര്‍ക്കും ഡയറ്റിലുള്‍പ്പെടുത്താവുന്നൊരു ചേരുവയാണിത്. കാരണം ഇത് കലോറി കുറയ്ക്കുന്നതിന് നമ്മെ സഹായിക്കുന്നതാണ്.