'ഭൂമിക്കായി ഒരു ദിവസം'; ഇന്ന് ലോക പരിസ്ഥിതി ദിനം

പ്രകൃതിയെയും പരിസ്ഥിതിയെയും സംരക്ഷിക്കേണ്ടതിന്റെ പ്രാധാന്യം ലോകജനതയെ ഓർമ്മിപ്പിക്കുന്ന ദിനമാണ് ഇന്ന്.

ഓരോ വർഷവും ജൂൺ 5-ാം തീയതി ആഗോളതലത്തിൽ ജനങ്ങൾ ലോക പരിസ്ഥിതി ദിനമായി ആചരിക്കുന്നു.

1972-ൽ സ്വീഡനിലെ സ്റ്റോക്ക്‌ഹോമിൽ നടന്ന ഐക്യരാഷ്ട്രസഭയുടെ മനുഷ്യ പരിസ്ഥിതി സമ്മേളനത്തിന്റെ ഭാഗമായി ലോക പരിസ്ഥിതി ദിനത്തിന് തുടക്കമിട്ടു.

തുടർന്ന് 1973- മുതൽ എല്ലാ വർഷവും ജൂൺ 5-ന് വിവിധ പ്രമേയങ്ങളോടെ ലോകമെമ്പാടും ഈ ദിനം ആചരിച്ചുവരുന്നു.

കാലാവസ്ഥാ വ്യതിയാനം, വനനശീകരണം, ജലമലിനീകരണം, പ്ലാസ്റ്റിക് മാലിന്യങ്ങൾ തുടങ്ങിയ പരിസ്ഥിതി വെല്ലുവിളികൾ വർധിച്ചുവരുന്ന സാഹചര്യത്തിൽ, പ്രകൃതിയെ സംരക്ഷിക്കാനും സുസ്ഥിരമായ ജീവിതശൈലി സ്വീകരിക്കാനും ഈ ദിനം എല്ലാവരെയും പ്രചോദിപ്പിക്കുന്നു.

ആദ്യകാലങ്ങളിൽ സർക്കാർ സംവിധാനങ്ങളുടെയും പരിസ്ഥിതി സംഘടനകളുടെയും നേതൃത്വത്തിൽ മാത്രമായിരുന്നു ലോക പരിസ്ഥിതി ദിനാചരണം.

എന്നാൽ കാലക്രമേണ വിദ്യാർത്ഥികൾ, യുവജനങ്ങൾ, സന്നദ്ധ സംഘടനകൾ, വ്യവസായ സ്ഥാപനങ്ങൾ, എന്നിവയും ഇതിന്റെ ഭാഗമായിത്തീർന്നു.

ഇന്ന് ലോക പരിസ്ഥിതി ദിനം 150-ലധികം രാജ്യങ്ങളിൽ കോടിക്കണക്കിന് ആളുകളുടെ പങ്കാളിത്തത്തോടെ ആചരിക്കപ്പെടുന്നു.

വൃക്ഷത്തൈ നടീൽ, ശുചീകരണ പ്രവർത്തനങ്ങൾ, ബോധവത്കരണ ക്യാമ്പയിനുകൾ, പരിസ്ഥിതി സെമിനാറുകൾ, പ്രകൃതി സംരക്ഷണ പദ്ധതികൾ തുടങ്ങിയവ ഈ ദിനത്തോടനുബന്ധിച്ച് സംഘടിപ്പിക്കപ്പെടുന്നു.

പ്രകൃതിയെ സംരക്ഷിക്കുക എന്നത് കേവലം ഒരു കടമയല്ല, മറിച്ച് നമ്മുടെ നിലനിൽപ്പിന്റെ തന്നെ അടിസ്ഥാനമാണ്. "പ്രകൃതിയിൽ നിന്ന് പ്രചോദനം ഉൾക്കൊണ്ട്, കാലാവസ്ഥയ്‌ക്കായി, നമ്മുടെ ഭാവിക്കായി" എന്നതാണ് ഇത്തവണത്തെ സന്ദേശം