ഈ സമയത്ത് ശരീരഭാരം നോക്കരുത്, കാരണം ഇതാണ്

വണ്ണം കുറയ്ക്കാനോ നിയന്ത്രിക്കാനോ ശ്രമിക്കുന്നവർ പതിവായി ഭാരം പരിശോധിക്കാറുണ്ട്.

എന്നാൽ എല്ലാ സമയത്തും സ്കെയിലിൽ കാണുന്ന സംഖ്യ നിങ്ങളുടെ യഥാർത്ഥ ശരീരഭാരമായിരിക്കണമെന്നില്ല.

ശരീരഭാരം പരിശോധിക്കുക്കുമ്പോൾ ഒഴിവാക്കേണ്ട സമയം ഏതാണെന്ന് അറിയാം.

ഭക്ഷണം കഴിച്ച ഉടൻ

ഭക്ഷണം കഴിച്ചതിന് ശേഷം ശരീരഭാരം സ്വാഭാവികമായി കൂടും. കാരണം ഭക്ഷണവും പാനീയങ്ങളും ആ സമയങ്ങളിൽ ദഹനപ്രക്രിയയിലായിരിക്കും. ഇത് കൊഴുപ്പ് കൂടിയതിന്റെ സൂചനയല്ല.

മദ്യപിച്ചതിന് ശേഷം

മദ്യം ശരീരത്തിലെ ജലാംശത്തിന്റെ സന്തുലിതാവസ്ഥയെ ബാധിക്കും. ഇതുമൂലം ഭാരം താൽക്കാലികമായി കൂടുകയോ കുറയുകയോ ചെയ്യാം. എന്നാൽ ഇത് ശരീരത്തിലെ കൊഴുപ്പ് വർധിച്ചതിനെയോ കുറഞ്ഞതിനെയോ പ്രതിഫലിപ്പിക്കുന്നില്ല.

ഉപ്പിട്ട ഭക്ഷണം കഴിച്ചതിന് ശേഷം

പിസ്സ, ചിപ്സ്, അച്ചാർ, ഫാസ്റ്റ് ഫുഡ് തുടങ്ങിയ ഉപ്പിന്റെ അളവ് കൂടുതലുള്ള ഭക്ഷണങ്ങൾ ശരീരത്തിൽ വെള്ളം പിടിച്ചുനിർത്താൻ കാരണമാകും. ഇതുമൂലം സ്കെയിലിൽ സാധാരണയേക്കാൾ കൂടുതൽ ഭാരം കാണിച്ചേക്കാം.

ചീറ്റ് മീൽ അല്ലെങ്കിൽ ഹൈ-കാർബ് ഡേയ്ക്ക് ശേഷം

ചോറ്, പാസ്ത, ബ്രെഡ്, മധുരപലഹാരങ്ങൾ തുടങ്ങിയ കാർബോഹൈഡ്രേറ്റ് കൂടുതലുള്ള ഭക്ഷണങ്ങൾ കഴിക്കുമ്പോൾ പേശികൾ കൂടുതൽ ഗ്ലൈകോജൻ സംഭരിക്കും. ഗ്ലൈകോജനോടൊപ്പം വെള്ളവും സംഭരിക്കപ്പെടുന്നതിനാൽ ഒന്നോ രണ്ടോ ദിവസത്തേക്ക് ഭാരം കൂടിയതായി തോന്നാം. ഇത് യഥാർത്ഥ കൊഴുപ്പ് വർധനയല്ല.

കഠിനമായ വ്യായാമത്തിന് തൊട്ടുപിന്നാലെ

തീവ്രമായ വ്യായാമത്തിന് ശേഷം ശരീരത്തിലെ ജലാംശത്തിൽ മാറ്റങ്ങൾ സംഭവിക്കാം. വിയർപ്പിലൂടെ വെള്ളം നഷ്ടപ്പെടുന്നതും പേശികളിലെ വീണ്ടെടുപ്പ് പ്രക്രിയയും ഭാരം താൽക്കാലികമായി മാറ്റാം.

രാത്രി സമയത്ത്

ദിവസം മുഴുവൻ ഭക്ഷണവും വെള്ളവും കഴിച്ചതിനാൽ വൈകുന്നേരമോ രാത്രിയോ ഭാരം സാധാരണയായി രാവിലത്തേക്കാൾ കൂടുതലായിരിക്കും. അതിനാൽ രാവിലെ ലഭിക്കുന്ന റിസൾട്ടും രാത്രി ലഭിക്കുന്ന റിസൾട്ടും താരതമ്യം ചെയ്യരുത്.

ഉറക്കക്കുറവുള്ള ദിവസങ്ങൾക്ക് ശേഷം

ഉറക്കക്കുറവ് ശരീരത്തിലെ ഹോർമോൺ പ്രവർത്തനത്തെയും ജലസംഭരണത്തെയും ബാധിക്കാം. ഇതുമൂലം ഭാരം താൽക്കാലികമായി ഉയരാൻ സാധ്യതയുണ്ട്.

ഭാരം പരിശോധിക്കാൻ ഏറ്റവും നല്ല സമയം

രാവിലെ എഴുന്നേറ്റ ഉടൻ, ശൗചാലയം ഉപയോഗിച്ചതിന് ശേഷം, ഭക്ഷണം കഴിക്കുന്നതിന് മുമ്പ് ഭാരം പരിശോധിക്കുന്നതാണ് ഏറ്റവും കൃത്യമായ രീതി.

എല്ലാ ദിവസവും ഒരേ സമയത്തും ഒരേ സാഹചര്യത്തിലും ഭാരം പരിശോധിച്ചാൽ യഥാർത്ഥ മാറ്റങ്ങൾ മനസിലാക്കാൻ എളുപ്പമാകും.