ചെറുനാരങ്ങാനീരും ഉപ്പും മതി, വീട്ടിലെ ചവിട്ടികള്‍ വൃത്തിയാക്കാം

വീട്ടിലിടുന്ന ചവിട്ടികളില്‍ വളരെ പെട്ടെന്നാണ് അഴുക്കും കറയുമാവുന്നത്.

ഇത് എളുപ്പത്തില്‍ വൃത്തിയാക്കുന്നതിനായുള്ള ചില പൊടിക്കൈകൾ പറഞ്ഞ് തരാം.

അല്പം വിനാഗിരി ഒരു പാത്രത്തിലെടുക്കുക. അതേ അളവില്‍ വെള്ളവും ചേര്‍ത്ത് ഒരു ബോട്ടിലില്‍ നിറച്ച് കറയുള്ള ഭാഗത്ത് സ്‌പ്രേ ചെയ്യുക. ഉടനെ തന്നെ ഒരു വൃത്തിയുള്ള തുണിക്കഷണം ഉപയോഗിച്ച് തുടച്ചെടുക്കാം.

രണ്ട് സ്പൂണ്‍ വിനാഗിരിയില്‍ ഒരുനുള്ള് ബേക്കിങ് സോഡ ചേര്‍ത്ത് നന്നായി യോജിപ്പിക്കുക. ഇത് കറയുള്ള ഭാഗത്ത് സ്‌പ്രേ ചെയ്ത് ഉടൻ തുടച്ച് കളയുക.

ചെറുനാരങ്ങാനീരില്‍ അല്പം ഉപ്പുചേര്‍ത്ത് ചവിട്ടിയിൽ ഈ മിശ്രിതമൊഴിച്ച് അരമണിക്കൂറെങ്കിലും വെക്കണം. ശേഷം കുറച്ച് വെള്ളം തൂവി, ഉണങ്ങിയ തുണി കൊണ്ട് തുടച്ചുമാറ്റാം.

കാപ്പിയുടെ കറയാണെങ്കില്‍ വിനാഗിരി അല്ലെങ്കില്‍ ഡിഷ് വാഷര്‍ സൊല്യൂഷൻ എടുത്ത് ഒരു ബൗളിലേക്ക് മാറ്റുക. വൃത്തിയുള്ളൊരു തുണി ഇതില്‍മുക്കി കറയുള്ള ഭാഗം തുടച്ചുകൊടുക്കാം. കറ പൂര്‍ണമായും മാറും.

ചവിട്ടിയില്‍ വൈന്‍ വീണാല്‍ അത് വൃത്തിയാക്കാന്‍ തണുത്തവെള്ളവും ഉപ്പും ഉപയോഗിക്കാം. നല്ല തണുത്തവെള്ളത്തില്‍ ഉപ്പ് ചേര്‍ത്ത് കറയുള്ള ഭാഗത്തൊഴിച്ചശേഷം, ഉണങ്ങിയ തുണികൊണ്ട് തുടച്ചെടുക്കാം.

എണ്ണയുടെയോ എണ്ണമയമുള്ള ഭക്ഷണത്തിന്റെയോ കറയാണെങ്കില്‍, അതിനുമുകളില്‍ അല്പം ബേക്കിങ് സോഡ വിതറുക. ശേഷം നനവുള്ള തുണികൊണ്ട് തുടച്ചുമാറ്റാം.