കുക്കർ ഉണ്ടോ? എങ്കിൽ നല്ല കട്ടി തൈര് ഉണ്ടാക്കാം

വീട്ടിൽ എത്ര ഉണ്ടാക്കിയാലും നല്ല കട്ടി തൈര് കിട്ടാൻ ഇത്തിരി പാടാണല്ലേ..

പക്ഷെ ഒരു കുക്കർ ഉണ്ടെങ്കിൽ സിംപിളായി നമുക്ക് നല്ല കട്ടി തൈര് ഉണ്ടാക്കാം.

കുക്കറിൽ കട്ടി തൈര് വീട്ടിൽ തയാറാക്കുന്നത് എങ്ങനെയെന്നു നോക്കാം.

നല്ല കട്ടിയുള്ള പാൽ (350 മില്ലി ലിറ്റർ) ഒരു പാത്രത്തിൽ ഒഴിച്ച് മീഡിയം തീയിൽ തിളപ്പിക്കുക.

നന്നായി തിളച്ചു പൊങ്ങി വരുമ്പോൾ തീ കുറച്ച് 5 മിനിറ്റ് പാൽ നന്നായി വേവിച്ച് എടുക്കുക. അതിനുശേഷം പാൽ തണുക്കുന്നതിനായി മാറ്റി വയ്ക്കുക.

ഒരു ഇളം ചൂട് ആകുമ്പോൾ തൈര് തയാറാക്കാൻ ഉപയോഗിക്കുന്ന പാത്രത്തിലേക്കു മാറ്റുക.

അതിലേക്കു ഒരു 2 ടേബിൾ സ്പൂൺ കട്ടി തൈര് ഒഴിച്ച് നന്നായി ഇളക്കുക.

ഒരു പ്രഷർ കുക്കറിലേക്കു നല്ല തിളയ്ക്കുന്ന ചൂട് വെള്ളം ഒഴിക്കുക. തൈര് യോജിപ്പിച്ച പാത്രം ഇറക്കിവെക്കാൻ പാകത്തിനുള്ള വെള്ളമാണ് എടുക്കേണ്ടത്.

തൈര് യോജിപ്പിച്ച പാത്രം ഒരു തട്ട് വച്ചു മൂടുക. ഒരു പാട് മുറുക്കുന്ന പോലെ ആകരുത്.

ഈ പാത്രം കുക്കറിലേക്ക് ഇറക്കി വെയ്ക്കുക.

അതിനുശേഷം പ്രഷർ കുക്കറിന്റെ അടപ്പു വച്ചു മൂടുക.എന്നിട്ട് ഒരു അര മണിക്കൂർ മാറ്റി വയ്ക്കുക.

നല്ല ചൂട് ഉള്ള സ്ഥലം ആണെങ്കിൽ അര മണിക്കൂറിൽ കട്ടി തൈര് തയാറാക്കാം. മഴയോ, തണുപ്പോ ഉള്ള സ്ഥലം ആണെങ്കിൽ ഒരു മണിക്കൂർ വരെ എങ്കിലും മാറ്റി വക്കണം.