'80കളിൽ ജീവിച്ചിട്ടില്ല, എന്നിട്ടും '80കളോട് പ്രണയമോ? ട്രെന്റിനു പിന്നിലെ മനശ്ശാസ്ത്രം

80കളുടെ നിറങ്ങളും ഫാഷനും പഴയ ക്യാമറകളുടെ ലുക്കും സിനിമാ പോസ്റ്ററുകളുടെ ഭാവവും ഒക്കെയായി സോഷ്യൽ മീഡിയയിൽ റെട്രോ ചിത്രങ്ങൾ വീണ്ടും നിറയുകയാണ്. പ്രത്യേകിച്ച് എഐ ഉപയോഗിച്ച് സ്വന്തം ചിത്രങ്ങളെ 1980കളിലെ ഫോട്ടോകളായി മാറ്റുന്ന ട്രെൻഡ് വലിയ ശ്രദ്ധ നേടിയിരുന്നു.

എന്നാൽ ഇതിൽ കൗതുകകരമായ മറ്റൊരു കാര്യമുണ്ട്. 80കളിൽ ജനിച്ചിട്ടില്ലാത്തവരും ആ കാലഘട്ടത്തിന്റെ ചിത്രങ്ങളും സംഗീതവും ഫാഷനും ഇത്രയധികം ഇഷ്ടപ്പെടുന്നത് എന്തുകൊണ്ടാണ്?

ഇത് വെറുമൊരു ഫാഷൻ ട്രെൻഡ് മാത്രമല്ല. നൊസ്റ്റാൾജിയ, സോഷ്യൽ മീഡിയ, സൗന്ദര്യബോധം, പഴയകാലത്തെക്കുറിച്ചുള്ള നമ്മുടെ സങ്കൽപ്പങ്ങൾ എന്നിവയെല്ലാം ഇതിന് പിന്നിലുണ്ട്.

നൊസ്റ്റാൾജിയ എന്ന് പറയുമ്പോൾ സാധാരണയായി നമ്മൾ അനുഭവിച്ചുപോയ കാലത്തെയോ സംഭവങ്ങളെയോ ഓർക്കുന്നതാണ് മനസ്സിലെത്തുക. എന്നാൽ മറ്റുള്ളവരുടെ ഓർമകളിലൂടെയും കഥകളിലൂടെയും സിനിമകളിലൂടെയും സംഗീതത്തിലൂടെയും പരിചയപ്പെട്ട കാലത്തോടും ഒരുതരം വൈകാരിക അടുപ്പം രൂപപ്പെടാം.

അതിനാൽ 80കളിൽ ജനിച്ചിട്ടില്ലാത്ത ഒരാൾക്കും ആ കാലത്തെക്കുറിച്ച് ഒരു പരിചിതമായ വികാരം ഉണ്ടാകാം. മാതാപിതാക്കളുടെ പഴയ ചിത്രങ്ങൾ, പഴയ സിനിമകൾ, ടെലിവിഷൻ പരിപാടികൾ, സംഗീതം, വസ്ത്രധാരണരീതി എന്നിവയിലൂടെ ആ കാലഘട്ടം പരിചിതമാകുന്നു.

ഒരു തലമുറയുടെ ബാല്യകാല ഓർമകൾ അടുത്ത തലമുറയിലേക്കും കൈമാറാറുണ്ട്. വീട്ടിലെ പഴയ ആൽബങ്ങൾ, മാതാപിതാക്കൾ പറയുന്ന കഥകൾ, അവർ കേട്ടിരുന്ന പാട്ടുകൾ, പഴയ സിനിമകൾ എന്നിവയിലൂടെ കുട്ടികൾക്ക് അവർ ജീവിച്ചിട്ടില്ലാത്ത കാലത്തോടും ബന്ധം തോന്നാം.

ഇത്തരം ഓർമകളെ ചിലപ്പോൾ വിക്കേറിയസ് നൊസ്റ്റാൾജിയ എന്ന ആശയവുമായി ബന്ധിപ്പിക്കാറുണ്ട്. മറ്റൊരാളുടെ അനുഭവങ്ങളിലൂടെ നമുക്ക് സ്വന്തം ഓർമപോലെ തോന്നുന്ന വൈകാരിക അനുഭവമാണിത്.

80കളെക്കുറിച്ച് ആളുകൾക്ക് പെട്ടെന്ന് ഓർമ വരുന്ന ചില കാര്യങ്ങളുണ്ട്. ബ്രൈറ്റ് നിറങ്ങൾ, ഫ്ലാഷ് ഫോട്ടോഗ്രഫി, ഫിലിം ഗ്രെയിൻ, പഴയ ക്യാമറകളുടെ ലുക്ക്, വിന്റേജ് ഫർണിച്ചർ, പ്രത്യേക ഹെയർസ്റ്റൈലുകൾ, ബോൾഡ് ഫാഷൻ തുടങ്ങിയവ. ഇന്നത്തെ ഡിജിറ്റൽ ലോകത്തിലെ വളരെ ക്ലീൻ, ഹൈ-ഡെഫിനിഷൻ ചിത്രങ്ങളിൽ നിന്ന് വ്യത്യസ്തമാണ് ഈ ലുക്ക്.

ഇന്നത്തെ ഫോട്ടോകൾ പലപ്പോഴും ഫിൽട്ടറുകളും എഡിറ്റിങ്ങും ഉപയോഗിച്ച് വളരെ പെർഫെക്റ്റായി തോന്നിക്കുന്നവയാണ്. അതിന് വിപരീതമായി പഴയ ഫോട്ടോകളിൽ ചെറിയ ബ്ലർ, ഫിലിം ഗ്രെയിൻ, ലൈറ്റിങ് വ്യത്യാസങ്ങൾ, സ്വാഭാവികമായ പോസുകൾ എന്നിവ കാണാം.

എഐ ഉപയോഗിച്ച് പഴയകാല വസ്ത്രം ധരിച്ചുള്ള ചിത്രങ്ങൾ, പഴയ വീടുകൾ, ഫിലിം ക്യാമറയുടെ ലുക്ക്, പഴയ സിനിമാ പോസ്റ്ററുകളെ ഓർമിപ്പിക്കുന്ന പശ്ചാത്തലങ്ങൾ എന്നിവ സൃഷ്ടിക്കാം.ഇതിലൂടെ ഒരിക്കലും അനുഭവിച്ചിട്ടില്ലാത്ത ഒരു കാലഘട്ടത്തിൽ സ്വന്തം ഒരു സങ്കൽപ്പിത ഓർമ സൃഷ്ടിക്കുകയാണ് ആളുകൾ ചെയ്യുന്നത്