കണ്ടാൽ വിശ്വസിക്കില്ല; ഭൂമിയിലെ ഈ അത്ഭുതലോകങ്ങൾ

ഗ്രാൻഡ് പ്രിസ്മാറ്റിക് സ്പ്രിങ്, അമേരിക്ക

അമേരിക്കയിലെ യെല്ലോസ്റ്റോൺ ദേശീയോദ്യാനത്തിലുള്ള ഗ്രാൻഡ് പ്രിസ്മാറ്റിക് സ്പ്രിങ് നിറങ്ങളുടെ വിസ്മയമാണ്. മഞ്ഞ, ഓറഞ്ച്, ചുവപ്പ്, പച്ച തുടങ്ങിയ നിറങ്ങളിൽ തിളങ്ങുന്ന ഈ ചൂടുനീരുറവയ്ക്ക് ചുറ്റുമുള്ള നിറവ്യത്യാസങ്ങൾക്ക് കാരണം ചൂടിനെ അതിജീവിക്കുന്ന ബാക്ടീരിയകളാണ്.

ഏകദേശം 200–330 അടി വ്യാസവും 121 അടിയിലധികം ആഴവുമുണ്ട് ഈ ചൂടുനീരുറവക്ക്

ഇജൻ ക്രേറ്റർ, ഇന്തോനേഷ്യ

ഇന്തോനേഷ്യയിലെ കിഴക്കൻ ജാവയിലുള്ള ഇജൻ ക്രേറ്റർ അപൂർവമായ പ്രകൃതിപ്രതിഭാസത്തിന്റെ പേരിലാണ് പ്രശസ്തം.

അഗ്നിപർവതത്തിലെ സൾഫർ വാതകങ്ങൾ വായുവുമായി സമ്പർക്കത്തിൽ കത്തുമ്പോഴാണ് രാത്രിയിൽ കാണുന്ന നീല തീജ്വാലകൾ രൂപപ്പെടുന്നത്. ലോകത്ത് വളരെ അപൂർവമായി മാത്രം കാണുന്ന പ്രതിഭാസമാണിത്.

ഷാങ്ജിയാജി, ചൈന

ചൈനയിലെ ഷാങ്ജിയാജി നാഷണൽ പാർക്ക് ആയിരക്കണക്കിന് മണൽക്കല്ല് തൂണുകൾ പോലെയുള്ള മലനിരകളാൽ നിറഞ്ഞതാണ്.

മൂടൽമഞ്ഞിൽ ഉയർന്നുനിൽക്കുന്ന ഈ പാറക്കൂട്ടങ്ങൾ സയൻസ് ഫിക്ഷൻ സിനിമയിലെ രംഗങ്ങളെ ഓർമിപ്പിക്കുന്നു. അവതാർ സിനിമയിലെ ഫ്ലോട്ടിങ് മൗണ്ടൈൻസിന് പ്രചോദനമായ സ്ഥലങ്ങളിലൊന്നായി ഈ പ്രദേശം അറിയപ്പെടുന്നു.

ഫറോ ദ്വീപുകൾ

ഐസ്‌ലാന്റിനും നോർവേയ്ക്കുമിടയിൽ സ്ഥിതി ചെയ്യുന്ന ഫറോ ദ്വീപുകൾ 18 അഗ്നിപർവത ദ്വീപുകളുടെ കൂട്ടമാണ്.

കടലിലേക്ക് നേരിട്ട് പതിക്കുന്ന വെള്ളച്ചാട്ടങ്ങൾ, കുത്തനെയുള്ള പാറക്കെട്ടുകൾ, മലമുകളിലെ പുൽമേടുകളുള്ള വീടുകൾ, മൂടൽമഞ്ഞ് നിറഞ്ഞ അന്തരീക്ഷം എന്നിവയാണ് ഇവിടുത്തെ പ്രത്യേകത. ജൂൺ മുതൽ ഓഗസ്റ്റ് വരെയുള്ള കാലയളവാണ് സന്ദർശനത്തിന് ഏറ്റവും അനുയോജ്യം.

മാർബിൾ കേവ്സ്, പാറ്റഗോണിയ

ചിലി-അർജന്റീന അതിർത്തിയിലുള്ള ജനറൽ കരേര തടാകത്തിലാണ് മാർബിൾ കേവ്സ് സ്ഥിതി ചെയ്യുന്നത്.

ആയിരക്കണക്കിന് വർഷങ്ങളായി തിരമാലകൾ രൂപപ്പെടുത്തിയ മാർബിൾ ഗുഹകളുടെ ചുവരുകളിൽ നീലയും വെള്ളയും നിറത്തിലുള്ള വളഞ്ഞ വരകൾ കാണാം. തടാകത്തിന്റെ നിറവുമായി ചേരുന്ന ഈ പാറക്കൂട്ടങ്ങൾ ബോട്ടിൽ മാത്രമാണ് കാണാൻ കഴിയുക.