മുംബൈ: ഹിന്ദി നടന് അജയ് ദേവ്ഗണ് ഹെലികോപ്റ്റര് അപകടത്തില് മരിച്ചെന്ന വ്യാജപ്രചാരണത്തെക്കുറിച്ച് പൊലീസ് അന്വേഷണം ആരംഭിച്ചു. കഴിഞ്ഞ ദിവസങ്ങളില് വാട്സ് ആപ്പ് വഴിയാണ് നടന് മഹാബലേശ്വറിലെ അപകടത്തില് മരിച്ചതായി വ്യാപകമായ പ്രചാരണമുണ്ടായത്.
മഹാരാഷ്ട്രയിലെ സതാര ജില്ലയിലുള്ള മഹാബലേശ്വറിലുണ്ടായ ഹെലികോപ്റ്റര് അപകടത്തില് താരം മരിച്ചുവെന്ന് സമൂഹമാധ്യമങ്ങളില് വ്യാജ വാര്ത്ത പ്രചരിക്കുകയായിരുന്നു. സിനിമയില്നിന്നെടുത്ത അജയ് ദേവ്ഗണിന്റെ പരുക്കേറ്റ ചിത്രങ്ങള് സഹിതമാണ് വാര്ത്ത പ്രചരിച്ചത്. സമൂഹമാധ്യമങ്ങളില് ഇത്തരം വാര്ത്തകള് വ്യാപകമായി പ്രചരിച്ചതോടെ അത്തരമൊരു സംഭവം ഉണ്ടായിട്ടില്ലെന്ന് പൊലീസ് വിശദീകരിച്ചു.
വ്യാജ വാര്ത്തകള് പ്രചരിപ്പിച്ചതിന്റെ ഉറവിടം അന്വേഷിക്കുമെന്ന് പൊലീസ് വ്യക്തമാക്കി. റണ്ബീര് കപൂറുമായി ചേര്ന്നുള്ള ഏറ്റവും പുതിയ ചിത്രത്തിന്റെ ഷൂട്ടിംഗിലാണ് അജയ് എന്നാണ് അദ്ദേഹത്തോട് അടുത്ത വൃത്തങ്ങള് പറയുന്നത്. അകിവ് അലി സംവിധാനം ചെയ്യുന്ന ചിത്രത്തിന്റെ ഷൂട്ടിംഗുമായി ബന്ധപ്പെട്ട് അജയ് ദേവ്ഗണ് ഇപ്പോള് മുംബൈയില് തന്നെയുണ്ടെന്നാണ് റിപ്പോര്ട്ട്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ