തൃശൂര് ലോക്സഭാ സീറ്റിലേക്ക് മത്സരിക്കുന്ന എന്ഡിഎ സ്ഥാനാര്ത്ഥി സുരേഷ് ഗോപിയ്ക്ക് പിന്തുണ പ്രഖ്യാപിച്ചതിന് നടന് ബിജു മേനോന് സൈബര് ആക്രമണത്തിന് ഇരയായിരുന്നു. ഇപ്പോള് ബിജു മേനോന് പിന്തുണയുമായി എത്തിയിരിക്കുകയാണ് സുരേഷ് ഗോപിയുടെ മകനും നടനുമായ ഗോകുല് സുരേഷ്. ബിജു മേനോന് എന്ന നടനോളം തന്നെ അഭിപ്രായം നിര്ഭയം പറയുന്ന വ്യക്തിയെ ഇഷ്ടമാണ് എന്നാണ് ഫേയ്സ്ബുക്ക് കുറിപ്പിലൂടെ ഗോകുല് പറഞ്ഞത്.
'ഇങ്ങനെ ഒരേപോലത്തെ കമെന്റുകള് തന്നെ പലയിടത്തും വായിച്ച് മടുത്തു. മനസിലാക്കുന്നവര് മനസിലാക്കിയാല് മതി. ബിജു മേനോന് എന്ന നടനോളം ഇഷ്ടം അഭിപ്രായങ്ങള് നിവര്ന്ന നട്ടലോടെ നിര്ഭയം പറയുന്ന ബിജു ചേട്ടന് എന്ന വ്യക്തിയെ!' ഗോകുല് കുറിച്ചു. ബിജു മേനോന് എതിരേ സോഷ്യല് മീഡിയയില് വന്ന കമന്റുകളുടെ സ്ക്രീന് ഷോട്ടുകള് സഹിതമാണ് പോസ്റ്റ്.
കഴിഞ്ഞ ദിവസമാണ് സുരേഷ് ഗോപിയ്ക്ക് വേണ്ടി വോട്ട് അഭ്യര്ത്ഥിച്ച് ബിജു മേനോന് പൊതുവേദിയില് എത്തിയത്. തൃശൂരില് തിരഞ്ഞെടുപ്പ് പ്രചാരണത്തിന്റെ ഭാഗമായി നടത്തിയ പരിപാടിയിലാണ് ബിജു മേനോന് പങ്കെടുത്തത്. സുരേഷ് ഗോപിയെ ജനപ്രതിനിധിയായി കിട്ടിയാല് തൃശൂരിന്റെ ഭാഗ്യമാണെന്നും അദ്ദേഹത്തെ പോലെയൊരു മനുഷ്യസ്നേഹിയെ താന് വേറെ കണ്ടിട്ടില്ലെന്നുമാണ് ബിജു മേനോന് പറഞ്ഞത്. ഇതോടെ ബിജു മേനോന്റെ ഫേയ്സ്ബുക്ക് പേജില് പ്രതിഷേധം ഇരമ്പുകയായിരുന്നു. താരത്തെ രൂക്ഷമായി വിമര്ശിച്ച് നിരവധി പേരാണ് രംഗത്തെത്തിയത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ