ആറാം വയസ്സിൽ 'കളത്തൂർ കണ്ണമ്മ’ എന്ന ചിത്രത്തിലൂടെ ജെമിനി ഗണേശനും സാവിത്രിക്കും ഒപ്പം ക്യാമറയ്ക്ക് മുന്നിലെത്തിയ ആറ് വയസ്സുകാരൻ ഇന്ന് അഭിനയത്തിന്റെ ഷഷ്ഠിപൂര്ത്തി ആഘോഷിക്കുകയാണ്. സിനിമ അരങ്ങേറ്റത്തിന് അറുപതാം വാർഷികം കുറിക്കുമ്പോഴും സെറ്റിൽ പുതിയ ചിത്രത്തിന്റെ തിരക്കുകളിലാണ് ഉലകനായകൻ. ഏറെ പ്രതീക്ഷയോടെ കാത്തിരിക്കുന്ന ഇന്ത്യൻ 2 ഇന്നുമുതൽ ചിത്രീകരണം തുടങ്ങി.
1996ല് പുറത്തിറങ്ങിയ ആദ്യ ഭാഗത്തിന്റെ പിന്തുടര്ച്ചയായി ചിത്രം വീണ്ടും ഒരുങ്ങുമ്പോള് സ്വാതന്ത്ര്യസമരസേനാനിയും കളരിഅഭ്യാസിയുമായ സേനാപതി ആയിതന്നെയാണ് കമൽ ഹാസൻ എത്തുന്നത്. തന്റെ ക്ലീന് ഷേവ് ലുക്ക് ഇന്ത്യന് 2വിന്റെ ഭാഗമായുള്ളതാണെന്ന് മുന്പൊരിക്കല് താരം വെളിപ്പെടുത്തിയിരുന്നു. രണ്ട് പതിറ്റാണ്ടിന് ശേഷം കമന് ഹാസനും ശങ്കറും വീണ്ടും ഒന്നിക്കുന്ന ചിത്രമാണെന്ന പ്രത്യേകതയും ഇന്ത്യന് 2വിനുണ്ട്.
രാകുൽ പ്രീതിന്റെ ഇൻസ്റ്റഗ്രാം പോസ്റ്റിലൂടെയാണ് ചിത്രീകരണം തുടങ്ങിയ വിവരം ആരാധകർ അറിയുന്നത്. രാകുല് പ്രീതിന് പുറമേ കാജല് അഗര്വാള്, സിദ്ധാര്ത്ഥ്, പ്രിയ ഭവാനി ശങ്കര് തുടങ്ങിയവരും ചിത്രത്തില് അണിനിരക്കുന്നുണ്ട്. കമല് ഹാസന്റെ ചെറുമകനായാണ് സിദ്ധാര്ത്ഥ് വേഷമിടുന്നതെന്നാണ് റിപ്പോര്ട്ടുകള്.
രാഷ്ട്രീയത്തിലേക്ക് കടന്ന കമല് ഹാസന്റെ അവസാന ചിത്രമായിരിക്കും ഇന്ത്യന് 2 എന്ന തരത്തില് അഭ്യൂഹങ്ങള് ഉണ്ടായിരുന്നെങ്കിലും 'തലൈവന് ഇരുക്കിറാന്' എന്ന മറ്റൊരു തമിഴ് ചിത്രവും അണിയറയില് ഒരുങ്ങുന്നുണ്ട്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ