നടി മഞ്ജു വാര്യരുടെ പരാതിയില്‍ സംവിധായകന്‍ വി എ ശ്രീകുമാര്‍ തെളിവെടുപ്പിന് ഹാജരായില്ല. ഞായറാഴ്ച ഹാജരാകാന്‍ ആവശ്യപ്പെട്ട് നോട്ടീസ് നല്‍കിയിട്ടും ശ്രീകുമാര്‍ എത്തിയില്ല. കഴിഞ്ഞ ദിവസം ശ്രീകുമാറിന്റെ പാലക്കാട്ടെ വീട്ടിലും ഓഫീസിലും പൊലീസ് റെയിഡ് നടത്തിയിരുന്നു. അന്ന് സ്ഥലത്തില്ലാതിരുന്നതിനാലാണ് ശ്രീകുമാറിനോട് ഞായറാഴ്ച ഹാജരാകാന്‍ ആവശ്യപ്പെട്ടത്.
അസിസ്റ്റന്റ് കമ്മീഷണര്‍ സി ഡി ശ്രീനിവാസന്റെ നേതൃത്വത്തില്‍ തൃശൂര്‍ ക്രൈം ബ്രാഞ്ച് പൊലീസാണ് കേസന്വേഷിക്കുന്നത്. ശ്രീകുമാര്‍ മേനോനെതിരെ ഡിജിപിക്ക് നേരിട്ടെത്തി മഞ്ജു പരാതി നല്‍കുകയായിരുന്നു. ശ്രീകുമാര്‍ തന്നെ അപായപ്പെടുത്താന്‍ ശ്രമിക്കുമെന്ന് ഭയപ്പെടുന്നതായി ചൂണ്ടിക്കാട്ടിയാണ് മഞ്ജു പരാതി നല്‍കിയത്. ഗുരുതര ആരോപണങ്ങളാണ് പരാതിയില്‍ ഉന്നയിച്ചിരിക്കുന്നത്.
ഭീഷണിപ്പെടുത്തുന്ന വാട്‌സാപ്പ് സന്ദേശങ്ങളുടെ സ്‌ക്രീന്‍ഷോട്ട് അടക്കമുള്ള തെളിവുകള്‍ മഞ്ജു അന്വേഷണ സംഘത്തിനു കൈമാറിയിരുന്നു. പരാതിയില്‍ ശ്രീകുമാര്‍ മേനോനെതിരെ മൂന്ന് വകുപ്പുകള്‍ പ്രകാരം കേസെടുക്കുകയും ചെയ്തു. സ്ത്രീത്വത്തെ അപമാനിക്കുംവിധം അംഗവിക്ഷേപം നടത്തി, നടിയെ ഗൂഢ ഉദ്ദേശ്യത്തോടെ പിന്തുടര്‍ന്നു, സമൂഹമാധ്യമങ്ങള്‍ വഴി അപമാനിച്ചു എന്നീ വകുപ്പുകള്‍ പ്രകാരമാണ് കേസെടുത്തത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
