ലോകം ചുറ്റാന്‍ ഇഷ്ടപ്പെടുന്ന ഒരു ചെക്കന്‍. സിനിമയില്‍ എത്തുന്നതിന് മുന്‍പേ പ്രണവ് മോഹന്‍ലാല്‍ നമ്മുടെ മനസില്‍ കയറിപ്പറ്റിയത് താരത്തിന്റെ യാത്രയിലൂടെയാണ്. സിനിമയില്‍ എത്തിയിട്ടും യാത്രയ്‌ക്കൊന്നും കുറവില്ല. ആദ്യ ചിത്രമായ ആദിയുടെ റിലീസിന് പിന്നാലെ കാണാതായ പ്രണവിനെ പിന്നെ കണ്ടെത്തുന്നത് അങ്ങ് ഹിമാലയത്തില്‍ നിന്നാണ്. അടുത്തിടെ പുറത്തിറങ്ങിയ രണ്ടാമത്തെ ചിത്രം ഇരുപത്തിയൊന്നാം നൂറ്റാണ്ടിന് ശേഷവും യാത്രകളില്‍ തന്നെയാണ് താരം. സംവിധായകനും നായികയുമടക്കം പ്രമോഷന്‍ പരിപാടികളില്‍ സജീവമാകുമ്പോള്‍ പ്രണവ് മാത്രം തന്റെ വഴിക്കാണ്. എവിടെയ്ക്കാണ് എന്ന് പറയാതെ മുങ്ങിയ താരത്തെ അവസാനം ആരാധകര്‍ തന്നെ കണ്ടെത്തിയിരിക്കുകയാണ്.
ഇത്തവണ ഹംപിയിലേക്കായിരുന്നു പ്രണവിന്റെ യാത്ര. അവിടെ എത്തിയ മലയാളി ആരാധകരാണ് താരം ഹംപിയിലുള്ള കാര്യം പരസ്യപ്പെടുത്തിയത്. താരജാഡകളൊന്നുമില്ലാതെ അവര്‍ക്കൊപ്പം സെല്‍ഫിക്ക് പോസ് ചെയ്യുന്ന പ്രണവിനെയാണ് ചിത്രത്തില്‍ കാണുന്നത്. സിനിമയുടെ റിലീസിനെക്കുറിച്ച് താരത്തിന് പ്രത്യേകം ആശങ്കകള്‍ ഒന്നുമില്ലെന്നും പ്രണവ് വളരെ സിംപിളാണെന്നാണ് ആരാധകര്‍ പറയുന്നത്.
ഇരുപത്തിയൊന്നാം നൂറ്റാണ്ടിന്റെ റിലീസ്ദിനത്തില്‍ പോലും പ്രണവ് സ്ഥലത്തില്ലെന്നും മറിച്ച് യാത്രയിലാണെന്നും ഹംപിയിലേക്കാണ് ഇത്തവണ പോയിരിക്കുന്നതെന്നുമൊക്കെ ചിത്രത്തിന്റെ സംവിധായകന്‍ അരുണ്‍ ഗോപി വെളിപ്പെടുത്തിയിരുന്നു. അതിന് പിന്നാലെയാണ് താരത്തെ കണ്ടുകിട്ടിയത്. പ്രിയദര്‍ശന്‍- മോഹന്‍ലാല്‍ കൂട്ടുകെട്ടില്‍ ഒരുങ്ങുന്ന മരക്കാരാണ് പ്രണവിന്റെ മൂന്നാമത്തെ ചിത്രം. ഇതില്‍ മോഹന്‍ലാലിന്റെ ചെറുപ്പമായാണ് അഭിനയിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
