ന്യൂഡൽഹി: പ്രധാനമന്ത്രി നരേന്ദ്ര മോദിയെക്കുറിച്ചുള്ള ജീവചരിത്ര സിനിമയ്ക്ക് പിന്നാലെ കേന്ദ്ര മന്ത്രി നിതിൻ ഗഡ്കരിയെക്കുറിച്ചും ചലച്ചിത്രമിറങ്ങുന്നു. നാഗ്പുർ സ്വദേശിയായ അനുരാഗ് ഭുസാരിയാണ് സംവിധാനം ചെയ്യുന്നത്. 'ഗഡ്കരി' എന്നാണ് ചിത്രത്തിന്റെ പേര്. രാഹുൽ ചോപ്ഡയാണ് മുഖ്യ വേഷത്തിലെത്തുന്നത്.
മോദിക്ക് ബദലായി ഗഡ്കരിയെ ഉയർത്തിക്കൊണ്ടുവരാൻ ചില സംഘപരിവാർ കേന്ദ്രങ്ങൾ ശ്രമിക്കുന്നതായി അടുത്ത കാലത്ത് റിപ്പോർട്ടുകളുണ്ടായിരുന്നു. ഇതിന് പിന്നാലെയാണ് മോദിയുടെ ചലച്ചിത്രത്തിന് പിന്നാലെ ഗഡ്കരിയുടെ സിനിമയും രംഗ പ്രവേശം ചെയ്യാനൊരുങ്ങുന്നത്.
നിതിൻ ഗഡ്കരിയെക്കുറിച്ചുള്ള ചിത്രം യൂ ട്യൂബിലാണ് പുറത്തിറക്കുക. 2014 മുതൽ ഗഡ്കരിയെ അടുത്ത് നിന്ന് നിരീക്ഷിക്കുന്നുണ്ടെന്നും അദ്ദേഹത്തിന്റെ ജീവിതത്തിൽ സംഭവിച്ച കാര്യങ്ങളാണ് സിനിമയിലുണ്ടാകുകയെന്നും അനുരാഗ് ഭുസാരി പറഞ്ഞു.
മുൻ പ്രധാനമന്ത്രി മൻമോഹൻ സിങിനെക്കുറിച്ചുള്ള ആക്സിഡന്റൽ പ്രൈം മിനിസ്റ്റർ, ശിവസേന സ്ഥാപകൻ ബാൽ താക്കറെയുടെ ജീവിതം ആസ്പദമാക്കിയുള്ള താക്കറെ എന്നീ ചലച്ചിത്രങ്ങൾ സമീപ കാലത്തിറങ്ങിയിരുന്നു. തെരഞ്ഞെടുപ്പിന് മുൻപ് മോദി ചിത്രം പുറത്തിറങ്ങും. മാർച്ച് അഞ്ചിനാണ് ഗഡ്കരി ചിത്രം റിലീസ് ചെയ്യുന്നത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ