'സോളോ' ആയിരുന്നു ദുല്‍ഖറിന്റെ അവസാനം റിലീസ് ചെയ്ത തമിഴ്ചിത്രം. ഇപ്പോള്‍ താരത്തിന്റെ 'കണ്ണും കണ്ണും കൊള്ളൈയടിത്താല്‍'(കെകെകെ) എന്ന ചിത്രമാണ് റിലീസിന് തയാറെടുക്കുന്നത്. ഇതില്‍ പ്രശസ്ത സംവിധായകന്‍ ഗൗതം മേനോന് അഭിനയിക്കുന്നു എന്നതാണ് വലിയ വിശേഷം.
സിനിമയില്‍ വളരെയധികം പ്രാധാന്യമുളള വേഷത്തിലാകും ഗൗതം മേനോന് എത്തുകയെന്നാണ് റിപ്പോര്‍ട്ടുകള്‍. നവാഗതനായ ദേസിംഗ് പെരിയസാമിയാണ് 'കണ്ണും കണ്ണും കൊള്ളൈയടിത്താല്‍' എന്ന പുതിയ സിനിമ സംവിധാനം ചെയ്യുന്നത്. ചിത്രത്തില്‍ ഗൗതം മേനോന് വളരെ പ്രധാനപ്പെട്ട റോളാണ് കൈകാര്യം ചെയ്യുന്നതെന്ന് സംവിധായകന്‍ പറയുന്നു.
'ചിത്രത്തിലെ അഞ്ച് പ്രധാന കഥാപാത്രങ്ങളില്‍ ഒന്ന് അവതരിപ്പിക്കുന്നത് ഗൗതം മേനോന് ആണ്. 'ഗോലി സോഡ' എന്ന ചിത്രത്തില്‍ അദ്ദേഹം ഒരു ഗസ്റ്റ് റോളില്‍ എത്തിയിരുന്നു. എന്നാലിത് അദ്ദേഹത്തിന്റെ ആദ്യത്തെ മുഴുനീള കഥാപാത്രമായിരിക്കും'- ദേസിംഗ് പെരിയസാമി പറയുന്നു.
ചിത്രത്തില്‍ ഗൗതം മേനോന് പകരക്കാരനായി വേറെ ആരെയും അഭിനയിപ്പിക്കാന്‍ കഴിയില്ലെന്നാണ് സംവിധായകന്‍ പറയുന്നത്. 'സാധാരണ എല്ലാവരും ചെയ്യുന്നതുപോലെ സമുദ്രക്കനിയേയോ പ്രകാശ് രാജിനെയോ എനിക്ക് കാസ്റ്റ് ചെയ്യേണ്ട. എനിക്ക് പുതിയതായി എന്തെങ്കിലും വേണം. അതുകൊണ്ടാണ് ഗൗതം മേനോനെ കാസ്റ്റ് ചെയ്തത്'- സംവിധായകന്‍ കൂട്ടിച്ചേര്‍ത്തു.
ദുല്‍ഖര്‍ സല്‍മാന്റെ 25മത്തെ ചിത്രമാണെന്ന പ്രത്യേകതയും കൂടിയുണ്ട് ഈ സിനിമക്ക്. ഡിക്യുവിന്റെ തമിഴിലെ അഞ്ചാമത്തെ ചിത്രമാണിത്. സിനിമ റിലീസിങ്ങിനൊരുങ്ങവേ ചിത്രത്തിന്റെ ട്രെയിലറിനായുളള കാത്തിരിപ്പിലാണ് ആരാധകര്‍. റിതു വര്‍മ്മയാണ് ചിത്രത്തില്‍ ദുല്‍ഖറിന്റെ നായിക. ഒകെ കണ്‍മണിയിലേതു പോലെയൊരു കഥാപാത്രമായിരിക്കും ചിത്രത്തില്‍ ദുല്‍ഖറിനെന്നാണ് അറിയുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
