സംഗീത ആസ്വാദകരെ ഒന്നടങ്കം കണ്ണീരിലാഴ്ത്തിയാണ് ബാലഭാസ്‌കര്‍ ലോകത്തോടു വിടപറഞ്ഞത്. ആ മരണം സൃഷ്ടിച്ച ആഘാതത്തില്‍ നിന്ന് ഇപ്പോഴും കരകയറാനാകാത്തവരാണ് ബാലഭ്‌സ്‌കറിന്റെ സുഹൃത്തുക്കളും ബന്ധുക്കളുമെല്ലാം. സംഗീതലോകത്ത് ബാലുവുമായി സഹോദരതുല്യമായ സ്‌നേഹം കാത്തുസൂക്ഷിക്കുന്ന വ്യക്തിയാണ് സ്റ്റീഫന്‍ ദേവസി. ഇരുവരും തമ്മിലുള്ള അടുപ്പം പലപ്പോഴും വാര്‍ത്തകളില്‍ നിറഞ്ഞിട്ടുള്ളതുമാണ്. ഇപ്പോഴിതാ സൗദി അറേബ്യയില്‍ തന്റെ ആദ്യ സ്‌റ്റേജ് ഷോയ്‌ക്കെത്തിയപ്പോഴും സ്റ്റീഫന്‍ ബാലുവിന്റെ ഓര്‍മകളിലാണ്.
വേദികളില്‍ ഇരുവരും ഒന്നിച്ച് വിസ്മയം തീര്‍ത്ത നിമിഷങ്ങളൊന്നും സംഗീതാസ്വാദകര്‍ക്ക് മറക്കാനാവുന്നതല്ല. സ്റ്റീഫന്‍ കീബോര്‍ഡിലും ബാലഭാസ്‌കര്‍ വയനിലും ഒന്നിച്ചപ്പോഴൊക്കെ സംഗീതപ്രേമികള്‍ക്ക് മറക്കാനാവാത്ത മുഹൂര്‍ത്തങ്ങളായി അത് മാറി. ബാലഭാസ്‌കറുമായി ഒന്നിച്ച് എത്തണം എന്നാഗ്രഹിച്ച വേദിയില്‍ പരിപാടി അവതരിപ്പിക്കാന്‍ ബാലുവിനെയും ഒപ്പം കൂട്ടിയിരിക്കുകയാണ് സ്റ്റീഫന്‍.
പരിപാടിക്ക് മുമ്പായി നടത്തിയ ലൈവിലാണ് ബാലുവിനെ ഒപ്പം കൂട്ടുന്നെന്ന് സ്റ്റീഫന്‍ പറഞ്ഞത്. ആദ്യമായാണ് സൗദിയില്‍ പരിപാടി ചെയ്യുന്നതെന്നു ഈ പരിപാടിക്ക് ഒപ്പമുണ്ടാകണം എന്നാഗ്രഹിച്ച മ്യൂസീഷ്യനെ ഒപ്പം കൊണ്ടുവന്നെന്നും പറഞ്ഞ് ടീഷര്‍ട്ടില്‍ പതിപ്പിച്ചിരുന്ന ബാലുവിന്റെ ചിത്രം സ്റ്റീഫന്‍ കാണിച്ചു. 'ബാല എന്നോടൊപ്പം ഇന്നുണ്ടാകും. ഞങ്ങളൊരുമിച്ച് സ്‌റ്റേജില്‍ പരിപാടി അവതരിപ്പിക്കും' എന്നു പറഞ്ഞാണ് സ്റ്റീഫന്‍ വീഡിയോ അവസാനിപ്പിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
