മുംബൈ: ബോളിവുഡ് നടൻ സിദ്ധാർത്ഥ് മൽഹോത്രയുടെ ഫാഷൻ ഷോയ്ക്കിടെ റാമ്പിൽ അപ്രതീക്ഷിത അതിഥി. അതിഥിയെ കണ്ട് കാണികൾ അമ്പരന്നു. എന്നാൽ യാതൊരു ഭാവഭേദവും ഇല്ലാതെയായിരുന്നു അതിഥിയുടെ നിൽപ്പും നടപ്പും. ഒടുവിൽ അനധികൃതമായി റാമ്പിൽ കടന്നെത്തിയ അതിഥിയെ പുറത്തേക്ക് ഓടിച്ചാണ് സംഘാടകർ പരിപാടി പൂർത്തിയാക്കിയത്.
കഴിഞ്ഞ ദിവസം ഡിസൈനർ രോഹിത് ബാലിനായി ബ്ലെൻഡേഴ്സ് പ്രൈഡ് ഫാഷൻ ടൂറിൽ സിദ്ധാർഥ് റാമ്പിൽ നിൽക്കെയാണ് അപ്രതീക്ഷിത അതിഥി എത്തിയത്. സുരക്ഷാ മേഖല മറികടന്ന് ഒരു നായ റാമ്പിലേക്ക് കയറുകയായിരുന്നു. സിദ്ധാർഥ് നടന്നു തുടങ്ങുന്നതിനു തൊട്ടുമുമ്പായിരുന്നു ഇത്. സ്റ്റേജിലുണ്ടായിരുന്ന മോഡലുകൾക്കു മുന്നിൽ നെഞ്ചു വിരിച്ച്, വാലാട്ടി "അതിഥി’ നിന്നു.
ഇതിനുശേഷം നായ റാമ്പിൽ മോഡലുകൾക്കിടയിലൂടെ നടപ്പു തുടങ്ങി. ഇതോടെ കാഴ്ചക്കാരുടെയും കാമറകളുടെയും ശ്രദ്ധ മുഴുവൻ നായയിലായി. തുടർന്ന് നായയെ പുറത്താക്കാൻ സംഘാടകർ രംഗത്തെത്തുകയായിരുന്നു. ഒരു വശത്തുകൂടി കടന്നുവന്ന നായ പക്ഷെ, വേദിയിലൂടെ നടന്ന് മറുവശത്തുകൂടിയാണ് പ്രകടനം പൂർത്തിയാക്കി വേദി വിട്ടത്. നായ സമീപത്തെ കുറ്റിക്കാട്ടിലേക്ക് പോയതിന് ശേഷമാണ് സിദ്ധാർത്ഥ് റാമ്പിലെത്തിയത്. നായയുടെ റാമ്പിലെ "മിന്നുംപ്രകടനം’ സമൂഹമാധ്യമങ്ങൾ വൈറലായിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
