ബോളിവുഡ് സൂപ്പര്‍ താരം സല്‍മാന്‍ ഖാന്‍ നായകനായി എത്തുന്ന പുതിയ ചിത്രം ഭരത് പുറത്തിറങ്ങുന്നത് തെന്നിന്ത്യന്‍ ഭാഷകളിലേക്ക് മൊഴിമാറ്റി. മലയാളത്തിലേക്ക് മൊഴിമാറ്റിയാവും കേരളത്തിലെ തീയെറ്ററുകളില്‍ ചിത്രം റിലീസിന് എത്തുന്നത്. കൂടാതെ തമിഴ്, തെലുങ്ക് ഭാഷകളിലും ചിത്രം തീയെറ്ററില്‍ എത്തും. അലി അബ്ബാസ് സഫര്‍ സംവിധാനം ചെയ്യുന്ന ചിത്രത്തില്‍ കത്രീന കൈഫാണ് നായികയായി എത്തുന്നത്.
അമീര്‍ ഖാനും അമിതാഭ് ബച്ചനും പ്രധാന വേഷത്തില്‍ എത്തിയ തഗ്‌സ് ഓഫ് ലൈഫിന് പിന്നാലെയാണ് ഒരു ബോളിവുഡ് ചിത്രം തെന്നിന്ത്യന്‍ ഭാഷകളില്‍ കൂടെ റിലീസിന് എത്തുന്നത്. കൂടുതല്‍ പേരിലേക്ക് സിനിമയെ എത്തിക്കുന്നതിന്റെ ഭാഗമായി തെന്നിന്ത്യന്‍ ഭാഷകളിലേക്ക് ചിത്രം മൊഴി മാറ്റുന്നത് ഇപ്പോള്‍ വ്യാപകമാവുകയാണ്. തെലുങ്ക് ചിത്രം ബാഹുബലി ഇത്തരത്തില്‍ വിവിധ ഭാഷകളിലായാണ് പുറത്തിറങ്ങിയത്. വന്‍ വിജയമാണ് സിനിമ നേടിയത്. ഇതിന്റെ ചുവടുപിടിച്ചാണ് സല്‍മാന്‍ ഖാനും തന്റെ ചിത്രം വിവിധ ഭാഷകളില്‍ പുറത്തിറക്കുന്നത്.
വര്‍ഷങ്ങള്‍ക്ക് മുന്‍പ് നടന്ന സംഭവത്തെ ആസ്പദമാക്കിയാണ് സിനിമ. ചിത്രത്തിന്റെ ഷൂട്ടിങ് കഴിഞ്ഞ ആഴ്ചയാണ് അവസാനിച്ചത്. മുംബൈ ഫിലിം സിറ്റിയില്‍ പഴയ ഡല്‍ഹി നഗരത്തിന്റെ സെറ്റിട്ടാണ് ചിത്രീകരിച്ചത്. ജാക്കി ഷേറോഫ്, തബു, സുനില്‍ ഗ്രോവര്‍, വരുണ്ഡ ധവാന്‍, ദിയ പഠാണി എന്നിവരും അഭിനയിക്കുന്നുണ്ട്. ജൂണ്‍ അഞ്ചിനാണ് ചിത്രം റിലീസ് ചെയ്യുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
